Almatylyqtar Baqytjan Saǵyntaevtan tarıhı gúlzardy qalpyna keltirýdi surady
ALMATY. QazAqparat – Almaty Ekologııalyq qoǵamy ókilderi qala ákimi Baqytjan Saǵyntaevqa Ortalyq saıabaqtaǵy gúlzardy qalpyna keltirýge ótinish bildirdi, dep habarlaıdy QazAqparat tilshisi.
Olardyń aıtýynsha, qazir sol jerde ornalasqan eskertkish kópshiliktiń kóńilinen shyqpaıdy.
«Byltyr kóktemde saıabaqty 80 jyl boıy árlendirip turǵan gúlzar súrilip tastaldy. Eshkim qoǵamdyq tyńdaý ótkizgen joq. Saıabaq basshylyǵy ótinishimizdi elemedi. Gúlzardyń ornyna túıe men tyshqan sekildi janýarlardyń músini paıda boldy. Bul músinder zoobaq terrıtorııasyna aýystyrylýyn suraımyz. Ornyna gúlzarymyz qaıtarylsyn», - dedi áleýmettik jelide belsendiler.
Turǵyndardyń ótinishine qalalyq Jasyl ekonomıka basqarmasy jaýap berdi.
«2018 jyly «Altyn Taraz» JShS Almaty qalalyq Ortalyq saıabaǵyn abattandyrý jumystaryn júrgizdi. Alleıa ortalyǵynda «Táńiri kúntizbesi» jáne «Almaty myńjyldyq qala monetasy» músinderi paıda boldy. Sonymen qatar, fýtbol, voleıbol, basketbol alańdary, skaıtpark, rollerdrom, Work Out aımaǵy jasaldy. Bul alańdar kópshilikke qoljetimdi. Kez kelgen adam sportpen aınalysa alady. 2019 jyly ınvestor balalar qalashyǵy jaqty abattandyrýdy bastady. Ol jaqta sýburqaq qalpyna keltirilip, kespetastar ornatylady. Mýzykalyq aspaptar mýzykalyq baqta ornalastyrylatyn bolady. Bul jumystar 2020 jyldyń kókteminde aıaqtalady. Atalǵan ınvestor mindetti túrde parkti kógaldandyryp, kópjyldyq, birjyldyq gúlderdi otyrǵyzatyn bolady», - dedi basqarmadan.
Foto: www.facebook.com /Zaşıtım Alma-Atý/Almaty
