Almatylyqtar aıaldamada avtobýsty saǵattap kútkenderine shaǵymdandy
ALMATY. QazAqparat – Almatylyqtar tańǵy qarbalas kezinde aıaldamada avtobýsty saǵattap kútkenderine shaǵymdandy, dep habarlaıdy QazAqparat tilshisi.
Aıaldamada avtobýs kútken jolaýshylardyń vıdeosy áleýmettik jelide tarady.
Qala ákimdigi beınejazbada Raıymbek-Áshimov kóshesindegi «№ 7-shi qalalyq aýrýhana» aıaldamasy ekenin málim etti.
«Áleýmettik jelide taraǵan «№ 7-shi qalalyq aýrýhana» aıaldamasy. Bul jermen kúnine 263 birlik qoǵamdyq kólik júredi. Atap aıtqanda, № 18, 14, 15, 16, 23, 26, 27, 31, 47, 67, 78, 95, 102, 112, 115, 118, 128, 202. Baǵyt kestesiniń buzylýy joldaǵy keptelispen baılanysty bolady. Sonymen qatar,kóshelerdegi jóndeý jumystaryda kedergi keltirdi. Ortalyq dıspetcherlik qyzmet ár baǵyttyń qozǵalysyn baqylaıdy, aýytqýlar bolǵan jaǵdaıda olar tasymaldaýshyǵa shara qoldaný týraly aıtady»,- dep habarlady ákimdikten.
Jalpy, qalada 2 myńǵa jýyq avtobýs bar.
«Búginde avtobýs parkterinde janarmaı tapshylyǵy joq»,-dep naqtylady ákimdikten.
