Almatylyqtar aýyr atletıkany óte jaqsy kóretinine kýá boldyq, bıletterdiń biri qalmaı satylyp ketti - A.Muhamedıuly

ALMATY. QazAqparat - Almatyda búgin bastalǵan Aýyr atletıkadan álem chempıonaty qala turǵyndarynyń tarapynan úlken qyzyǵýshylyq týǵyzyp otyr. Bul týraly búgin ótken baspasóz konferentsııasy barysynda QR Mádenıet jáne sport mınıstri Arystanbek Muhamedıuly aıtty.

Dúbirli dodanyń basty ereksheligi Rıo-de-Janeıroda eki jyldan soń ótetin jazǵy Olımpıada oıyndaryna joldama tartysqa túsedi.

«Atalǵan chempıonatty ótkizý tek qana Almaty úshin ǵana emes, Qazaqstan úshin óte mańyzdy bolyp otyr. Almaty halqy aýyr atletıkany óte jaqsy kóretinine kýá boldyq. Óıtkeni, bıletterdiń biri qalmaı satylyp ketti. Biz halyqaralyq sport saıystaryn jylda ótkizemiz. Basty maqsatymyz - halyqty sportpen aınalysýǵa shaqyrý. Memleket basshysy halqymyzdyń bilimdi ult bolý úshin deni saý, salaýatty ómir saltyn ustanatyn azamattardyń kóp bolýyn atap ótken bolatyn. Men, Qazaqstannyń sport boıynsha álemniń azýy alty qarys derjavalary AQSh, Japonııa, Qytaımen qatar tura alady degen oıdamyn», - dedi mınıstr.

Onyń aıtýynsha, atalǵan sporttyq sharalardyń bir rettik emes, jalpy buqaralyq sıpat alýyna basty basymdyq berý kerek.

«Búgin álem rekordtarynyń jańaratynyna kámil senemin», - dedi A.Muhamedıuly.