Almatylyqtar aýlany abattandyrý, sport alańyn jasaýda óz jobalaryn iske asyra alady
ALMATY. QazAqparat - Almaty qalasynyń ákimi Baqytjan Saǵyntaev almatylyqtardy «Bıýdjetke qatysý» jobasyna belsendi atsalysýǵa shaqyrdy, dep habarlaıdy QazAqparat tilshisi.
«Qurmetti almatylyqtar, ózim buryn aıtqanymdaı, biz «Bıýdjetke qatysý» jobasyn bastaımyz. Aýlalardy abattandyrý, saıabaqtar men skverler, sport alańdaryn jasaý jóninde ózderińizdiń ıdeıalaryńyzdy, jeke jobalaryńyzdy usynyńyzdar», - dep jazdy qala ákimi instagram-ǵy paraqshasynda.
Joba boıynsha qalanyń 8 aýdanynyń árqaısysyna bıýdjetten 500 mln teńgege deıin bólinedi. Óz usynystaryńyzdy 19 tamyzdan bastap Almaty qalasy ákimdiginiń Open Almaty qoǵamdyq qabyldaýynyń portaly arqyly jiberýlerińizge bolady.
«Sizderdiń barlyq usynystaryńyz ashyq túrde jarııalanady, qala turǵyndary úzdik jobaǵa daýys bere alady. Krıterııler, usynystardy joldaý men jobalardy irikteý jónindegi tolyq aqparat @OpenAlmaty qalalyq portalynda jarııalanǵan. Sizder belsendilik tanytady degen senimdemin»,- dep qosty Baqytjan Saǵyntaev
Buǵan deıin Baqytjan Saǵyntaev Almatyda «Jasyl Almaty» jobasy boıynsha megapolıste mıllıon túp aǵash otyrǵyzylatyny týraly aıtqan bolatyn.
