Almatylyqtar aýlada jáne saıajaıǵa barǵanda qandaı erejelerdi ustanýy tıis

ALMATY. QazAqparat – Almatyda Bas memlekettik sanıtar dárigerdiń qaýlysy boıynsha karantın kezinde oıyn alańdaryna, baý-baqshaǵa barý sharttary reglamentteldi, dep habarlaıdy QazAqparat tilshisi.

Qujatqa sáıkes, halyqqa oıyn alańdary men aýlaǵa saǵat 5:00-den 21:00-ge deıin shyǵýǵa ruqsat etilgen. Balalardyń oıyn alańdary men aýla aýmaǵyna zalalsyzdandyrý jumystaryn PIK júrgizedi. Barlyq qoljetimdi jerlerde, eń aldymen habarlandyrý taqtalarynda karantın tártibin saqtaý sheńberinde talap etiletin jeke jáne zańdy tulǵalarǵa arnalǵan eskertýler ornatylady.

Almaty qalasynyń turǵyndary oıyn alańy men aýlaǵa shyǵyp, baý-baqsha, saıajaıǵa barǵan kezde 2 metrden kem emes áleýmettik qashyqtyqty saqtaýy tıis. Otbasy múshelerin qospaǵanda, úsh adamnan astam adamnyń jınalýyna tyıym salynyp, basqa turǵyndarmen fızıkalyq qatynasty azaıtýǵa, ózimen birge jeke qorǵaný quraldaryn alyp júrýge jáne kııý erejelerin saqtaýǵa mindetteledi.

Al bul talaptardyń oryndalýyn quqyq qorǵaý organdarynyń qyzmetkerleri baqylaıdy.

Aıta ketý kerek, keshe Almaty qalasynyń bas sanıtar dárigeri Jandarbek Bekshın QR Prezıdenti Qasym-Jomart Toqaevtyń TJ rejimin uzartý týraly málimdemesinen soń jańa talaptardy jarııalaǵan bolatyn.