Almatylyqtar Astana kúnin merekelik kontserttermen atap ótýde
;ALMATY. Shildeniń 6-sy. QazAqparat /Erlik Erjanuly/ - Búgin Almatyda qala turǵyndary men qonaqtary Astana kúnin merekeleýde.
"Astanany kórý árbir qazaqstandyqtyń armany. Teledıdardan kórip, elden estip jatyrmyz. Bala-shaǵa aman bolsa bul armanymyz da júzege asatyny kúmánsiz. Bizdiń de ony kóretin kúnimiz alda dep oılaımyn. Aldymyzda áli de kóp belester bar. Oǵan qol jetkizý úshin zamanymyz tynysh bolyp, bereke-birligimiz buzylmasyn. 130-dan astam ult pen ulystyń basyn qosqan qazanymyz tógilmesin, qut-bereke shashylmasyn", deıdi zeınetker Ryshan Bastaýbaeva. Almaty oblysy Raıymbek aýdany Jalańash aýylynda 35 jyl muǵalim bop jumys jasaǵan ardaqty ustaz bul merekeni toılaýǵa zamandasy Márfııa Ádilhanovamen birge kelgen eken. "Men de sol aýylda 40 jyl muǵalym bolyp jumys istedim. Bala-shaǵam qazir Astanada turady. Astananyń kórkeıip, gúldenip jatqanyn estip, bilip jatyrmyz. Astana qazir elimizdiń aınasy bolyp otyr. Ondaǵy árbir jańalyqqa biz qýanyp otyramyz. Máselen keshegi Han shatyr sonyń naqty aıǵaǵy", deıdi M. Ádilhanova.
