Almatylyqtar Astana kúni elordalyqtarǵa HHІ ǵasyrdyń ınnovatsııalyq «Nomad» kıiz úıin tartý etedi
ALMATY. 5 shilde. QazAqparat - Almatydaǵy «Abaı» alańynda HHІ ǵasyrdyń ınnovatsııalyq «Nomad» kıiz úıiniń tanystyrylý rásimi ótti.
Ony elordalyqtarǵa almatylyqtardyń atynan shahar basshysy Ahmetjan Esimov Astana qalasynyń ákimi Imanǵalı Tasmaǵambetovke syılyq retinde tapsyrady. Jobanyń yntaly bastamashysy «DNK» brendtik bıýrosy, al bas seriktesi «Astana» zeınetaqy jınaqtaý qory bolyp otyr. Noý-haý kıiz úıdiń dızaıneri - Beket Músirepov. Onyń aıtýynsha, «Nomad» - jańa býyndaǵy kıiz úı. Ozyq tehnıkalyq jáne aqparatttyq tehnologııalarmen jabdyqtalǵan. Onyń ishinde spýtnıkti teledıdar men ǵalamtorǵa shyǵýǵa arnalǵan qajetti jabdyqtary bar kıiz úı eń aldymen qutqarýshylar jáne dala jaǵdaıynda jumys isteıtin arheologtar, geologtar úshin asa qajet baspana bolmaq. Tez bólshektelip, tez jınalatyn jáne az oryn alatyn kıiz úı avtomobıldiń júk salǵyshyna erkin syıyp, ońaı tasymaldanady. Onda kún energııasyn paıdalanyp, jyly eden men jylýdy, jaryqty, muzdatqysh jáne elektr plıtasyn kún bataraeıasy qýatymen qamtamasyz etedi.
«Alıýmınııden jasalǵan qańqasy qurylymnyń tasymaldanýy men jınalýyn jeńildetedi. Qazirgi zamanǵy aralas matalardan jasalǵan árleýi - ekologııalyq jaǵynan taza, órtke tózimdi, temperatýranyń kúrt aýytqýlaryna tótep berýge qabiletti», - deıdi B. Músirepov.
