Almatylyqtar asharshylyq qurbandarynyń rýhyna taǵzym etti
Osydan eki jyl buryn Elbasynyń tapsyrmasymen Almatynyń ortasynda ashqursaq balasyn qushaqtaǵan ashtyqtan álsiregen ananyń beınesinde asharshylyq qurbandaryna eskertkish ornatylǵan edi. Búgin qala turǵyndary osy eskertkishke gúl shoqtaryn qoıý úshin Qaraǵaıly saıabaǵyna jınaldy.
Almaty ákimi Baýyrjan Baıbek el tarıhyna kóz júgirtsek, ult basyna kún týǵan aýyr da almaǵaıyp kezeńderdiń az bolmaǵanyn, biraq qazaq halqy bolashaqqa degen úmiti men senimin eshqashan joǵaltpaǵanyn atap ótti.
«Elbasy aıtqandaı, tarıhqa jiti kózben qarap, ótkendi umytpaýymyz - osyndaı náýbet qaıtalanbas úshin qajet. Halyqtyń qasiretti kezeńderi ərdaıym eldiń jadynda bolýy tıis. Bul rette tutas ultty joıyp jibere jazdaǵan asharshylyq eshqashan umytylmaq emes. Búgingi Qazaqstan - halyqtyń birligi men kelisimin jáne beıbit ómirdi baǵa jetpes qundylyqqa baǵalaǵan el. Halyq aıtpaqshy, «jumyla kótergen júk jeńil». Mundaı náýbet eshqashan qaıtalanbasyn. Qashanda elimizdiń irgesi berik, bolashaǵy jarqyn bolsyn», - dep atap ótti Baýyrjan Baıbek.
Qazaqstanda 1918-1933 jyldar aralyǵynda túrli málimetter boıynsha úsh mıllıonnan astam adam qyrylyp qalǵan, onyń ishinde 1931-1933 jyldary 1,7 mıllıon adam kóz jumǵan. 100 myńnan astam qazaqstandyq 1937-1938 jyldarǵy repressııa qurbany bolǵan. 1997 jyly Qazaqstan Respýblıkasy Tuńǵysh Prezıdentiniń Jarlyǵymen 31 mamyr Saıası quǵyn-súrgin qurbandaryn eske alý kúni bolyp jarııalandy.
