Almatylyqtar asharshylyq qurbandaryna arnalǵan eskertkishke gúl shoqtaryn qoıdy
Qaza bolǵan azamattardyń rýhyna táý etýdi paryz sanaǵan azamattardyń biri - Mansur Moldaqulov.
Ol kisi atasy men ájesin eshqashan kórmeı ósken.
Qyzylorda oblysynyń týmasy Moldaǵul Sarman qylyshynan qan tamǵan repressııa jyldary Túrkııada bilim alyp jatqan.
Mansur Moldaǵulovtyń aıtýynsha, ol kisi Qurandy jaqsy bilgen, dinı bilimi óte joǵary, saýatty kózi ashyq azamat bolǵan.
«Meniń atamdy 1938 jyldary Túrkııanyń shpıony dep jala jaýyp, qýdalaı bastady. Sol kezde atam men ájem Ózbekstanǵa qashyp jan saýǵalady. Alaıda ákemniń aǵasy 9 jylǵa aıdalyp ketti. Men óz atam men ájemdi kórmedim. Meniń ákem de, men de Tashkentte týdyq. Atam men ájemniń súıegi Tashkentte jatyr. Sol kezde bilýimshe, 1 mıllıonnan asa qazaq basqa elderge bosyp ketken. 1990 jyldary Qazaqstanǵa keldim. Sodan keıin, 1995 jylǵa taman ákemniń týysqandaryn kóshirip aldym», - dedi Mansur Moldaǵulov.
Er adam týǵan tarıhty umytpaý - patrıottyq tárbıeniń bir kórinisi dep sanaıdy.
«Beıbit zamanda ómir súrip jatqanymyz biz úshin baqyt. Týǵan jerimiz bar, ánuranymyz bar, óz týymyz bar. Jeıtin asymyz bar. Osyǵan myń shúkir. Biraq, tarıhty keler urpaq bilýi kerek. Sol úshin osy eskertkishke kelip, kóz jumǵandardyń rýhyna taǵzym ettim», - dedi M.Moldaǵulov.
Almatydaǵy asharshylyq qurbandaryna arnalǵan eskertkish 2017 jyly 31 mamyrda saltanatty túrde ashylǵan bolatyn.
Aıta ketý kerek, búgin, 31 mamyrda qazaqstandyqtar asharshylyq pen saıası qýǵyn-súrgin qurbandaryn eske alý kúnin atap ótedi.
Bul ataýly data 1997 jyly Qazaqstan Respýblıkasynyń Prezıdenti Nursultan Nazarbaevtyń Jarlyǵymen bekitildi.
