Almatylyqtar aryqtyń las sýy aýyz sý qubyrymen aǵyp jatqanyna shaǵymdandy

ALMATY. QazAqparat- «Aqjar» shaǵynaýdanynyń turǵyndary aryqtyń las sýy taza aýyz sý qubyrymen aǵyp jatqanyna shaǵymdandy. Naýryzbaı aýdanynyń ákimdigi mán- jaıdy túsindirdi, dep habarlaıdy QazAqparat tilshisi.

Turǵyndardyń shaǵymy áleýmettik jelide tarady.

«Aryqtaǵy las sý aýyz sý qubyrymen aǵyp jatyr. Bul – shekten shyǵý. Bizde kúni boıy sý bolǵan joq. Biraq, biraz ýaqyttan keıin álgi kir sý aǵa bastady. Keıin Naýryzbaı aýdany ákimdiginiń qyzmetkerleri aryqtyń las sýy taza sý qubyrymen ótip jatqanyn rastady. Ony tas tóseý arqyly toqtatýǵa tyrysty. Ótken joly sýarmaly sýdy da qubyr arqyly jibergen bolatyn», - dep shaǵymdandy jeli qoldanýshy.

Óz kezeginde Naýryzbaı aýdany ákimdigi sý qubyrynyń ótkizý qabileti tómen bolǵandyqtan qıyndyq týyndaǵanyn málim etti.

«Almaty sý» memlekettik kásiporny men Naýryzbaı aýdandyq turǵyn úı-kommýnaldyq sharýashylyq bóliminiń kúshimen sýmen jabdyqtaý problemalaryn joıýǵa baǵyttalǵan is-sharalar kesheni jasalyp jatyr. Sý bolmaǵan kezde turǵyndarǵa aýyz sý arnaıy tehnıkamen jetkiziledi»,- dep habarlady ákimdiktegiler.

Sondaı-aq, «Aqjar» yqshamaýdanynyń turǵyndaryn úzdiksiz sýmen qamtamasyz etý úshin Almaty qalalyq energotıimdilik jáne ınfraqurylymdyq damý basqarmasynyń tapsyrysymen ınjenerlik kommýnıkatsııa (sýmen jabdyqtaý jáne káriz) qurylysy boıynsha keshendi jumys júrip jatyr.

Onyń ishinde súzgi stantsııasyn qaıta jańartý jáne jańa ınjenerlik jeliler salý jalǵasýda.

Qurylys jumystarynyń aıaqtalý merzimi - osy jyldyń jeltoqsan aıy.