Almatylyqtar ál-Farabı dańǵylyndaǵy qurylysty toqtatýdy talap etti
ALMATY. QazAqparat - Almatylyqtar taǵy da turǵyn úı qurylysyna shaǵymdandy. Bul joly «Samal-2» shaǵynaýdanynyń turǵyndary aryzdandy dep habarlaıdy QazAqparat tilshisi.
Almaty qalasynyń turǵyndary qala basshylaryna áleýmettik jeli arqyly úndeý joldady.
«Medeý aýdanynda ornalasqan «Samal-2 « shaǵynaýdanynyń №2, №2A, №12, №91 úılerinde turatyn 200-den astam otbasy turǵyn úıler men B.Momyshuly atyndaǵy №131 mektep-lıtseıiniń janynda salynyp jatqan qurylysty toqtatýdy suraımyz», - dep jazady turǵyndar.
Almaty qalalyq josparlaý jáne ýrbanıstıka basqarmasynyń málimetinshe, atalǵan aýmaqta «Eski úı» baǵdarlamasyna jatatyn úıler bar.
«Kórsetilgen mekenjaıda qandaı nysan salynatyndyǵy týraly aqparatty basqarma mamandary qurylys kompanııasyna berilgen ruqsat qujatyn kórgenen keıin qana bere alady. Qazirgi ýaqytta merdiger kompanııa basqarmaǵa eshqandaı ótinish bergen joq. Atalǵan aýmaqta « Eski úı» baǵdarlamasyna jatatyn úıler bar», - dep habarlady basqarmadan.
