Almatylyqtar ákimnen Jaısan turǵyn úı keshenin buzbaýdy surady

ALMATY. QazAqparat- Naýryzbaı aýdanynyń turǵyndary Erbolat Dosaevtan «Aqjar» shaǵyn aýdanynda zańsyz salynyp jatqan «Jaısan» turǵyn úı keshenin súrmeýdi surady, dep habarlaıdy QazAqparat tilshisi.

Naýryzbaı aýdany turǵynynyń aıtýynsha, eger atalǵan kópqabatty úı súriletin bolsa 800-ge jýyq otbasy baspanasyz qalady.

«Qalalyq sot «Jaısan» turǵyn úı keshenin buzý týraly sheshim shyǵardy. Oǵan turǵyndar narazymyz. Sol halyqtyń amanatyn arqalap, ózińizdiń aldyńyzǵa kelip turmyn. 800-ge jýyq otbasy baspanasyz qalǵaly tur. Osy máseleni ońtaıly sheship berseńiz»,- dedi Naýryzbaı aýdanynyń turǵyny kezdesý barysynda.

Megapolıs basshysynyń aıtýynsha, atalǵan turǵyn úı keshenin salyp jatqan qurylys kompanııasynyń eshqandaı ruqsat qaǵazy joq.

«Biz turǵyndarmen «Amanat» partııasynda kezdesý uıymdastyrdyq. Aýdan sotynyń sheshimine qatysty apellıatsııalyq shaǵym tústi. Bul sotta qaıta qaralatyn bolady. Biraq, barlyq jaýapkershilik qurylys kompanııasyna júktelgen. Qurylysty bastamas buryn ruqsat alýlary kerek edi. Jolyn qaraımyz, alaıda bári zań boıynsha sheshiledi. Búgin sizge naqty sheshimdi aıta almaımyn. Jumys toby qurylǵan. Tekserilip jatyr»,- dep jaýap berdi Erbolat Dosaev.

Aıta keteıik, buǵan deıin nysanda tekserý júrgizilip, tapsyrys berýshi Ákimshilik quqyq buzý kodekstiń 316-baby 1-bóligi, 321-baby, 463-babynyń 1-bóligi boıynsha ákimshilik jaýapkershilikke tartylǵan bolatyn.

Keıin basqarma Almaty qalasynyń mamandandyrylǵan aýdanaralyq ekonomıkalyq sotyna zańsyz salynǵan nysandy buzý týraly talap aryz joldady.