Almatylyqtar ákimge elektr qýatyn eseptegish quraldardyń qymbattyǵyn aıtyp shaǵymdandy
ALMATY. QazAqparat - Almaty ákimi Erbolat Dosaev turǵyndardyń qymbat eseptegish quraldaryna qatysty narazylyǵyna jaýap berdi, dep habarlaıdy QazAqparat tilshisi.
Áýezov aýdanynyń turǵyndary qala ákimimen kezdesýi barysynda «Alataý Jaryq Kompanııasy» AQ elektr jaryǵyna qosylý úshin qymbat eseptegishterdi (141 myń teńge turatyn) satyp alýǵa májbúr etetinin aıtty.
«Olar onlaın jumys istemeıdi. Eseptegishterdiń kórsetkishterin aı saıyn WhatsApp arqyly kontrollerge jiberemiz. Qurylǵylardyń qunyn tómendetip, AJK-ny modemdi qosýǵa mindetteýge bola ma?» - dep surady olar ákimnen.Erbolat Dosaev elektr eseptegishterge qatysty shaǵymdardy birinshi ret estip turmaǵanyn jetikizdi.
«Nege tek bir ǵana elektr eseptegish usynylady? AJK júıesimen biriktirilgen birqatar modelderdi usyný qısyndy, olardan málimetterdi onlaın alýǵa bolady jáne baǵasy men tehnıkalyq sıpattamalary boıynsha óndirýshini tańdaı alady», - dedi ákim.
Ákim Almaty qalasy boıynsha básekelestikti damytý jáne qorǵaý departamentine bir aı merzim ishinde esep qurylǵylaryna qatysty jaǵdaıdy sheshýdi tapsyrdy.«Sizderden usynylǵan eseptegish quraldardyń naqty krıterıılerin, olardyń qalaı ornatylǵany, qandaı uıymdar qatysatyny týraly aqparatty suraımyn. Bizge baǵa boıynsha da bári qajet. Taǵy naryqta qandaı qatysýshylar bar ekenin, kimge jáne ne úshin usynylǵanyn bileıik. Azamattarǵa baǵa men sapa sııaqty naqty krıterııler boıynsha ózderine jaqsy qyzmet kórsetetin eseptegishter men kompanııalardy tańdaý múmkindigin berý úshin sizderdiń sheshimderińiz ben usynystaryńyzdy kútemin. 1 naýryzǵa deıin jumysty aıaqtańyzdar», - dedi ákim.
