Almatylyqtar 7,3 mlrd teńgeniń dári-dármegimen qamtamasyz etildi

ALMATY. QazAqparat – Almatylyqtar ambýlatorııa deńgeıinde 7,3 mlrd teńgeniń dári-dármegimen qamtamasyz etildi. Bul týraly Almaty qalasy Áleýmettik medıtsınalyq saqtandyrý qorynyń dırektory Tileýhan Ábildaev málimdedi, dep habarlaıdy QazAqparat tilshisi.

Spıkerdiń aıtýynsha, búginde turǵyndar belgilengen syrqattar boıynsha qos paket sheńberinde tegin dári-dármek ala alady.

«Jalpy, medıtsınalyq qyzmet kólemi ǵana emes, syrqat túrine qaraı beriletin dári-dármek sany da birneshe ese artty. Mysaly, tegin medıtsınalyq kómek paketinde 50 nozologııa boıynsha dári beriledi. Al, saqtandyrý paketinde eresekter 50 túrli, balalar 73 túrli dert boıynsha tegin dári ala alady», - dedi Tileýhan Ábildaev.

Onyń málimetinshe, osy jyldyń bes aıynda Almatyda tegin medıtsınalyq kómek paketi boıynsha 131 myńnan astam adam dári-dármekpen qamtamasyz etildi. MÁMS paketi boıynsha 30 myńnan astam eresek, 11 myńǵa jýyq bala tegin dári-dármek aldy.

Sondaı-aq, Tileýhan Ábildaev tegin dári-dármek máselesi boıynsha «SK-Farmatsııanyń» 1439 baılanys ortalyǵyna habarlasýǵa bolatynyn aıtty.