Almatylyqtar 1 500 balanyń jańa jyldyq armanyn oryndaı alady
ALMATY. QazAqparat - Almatyda birqatar qaıyrymdylyq qory iri saýda oryndarynda arman-tilek shyrshalaryn ornatty. Bul shyrshalarǵa 1 500 jetim jáne jaǵdaıy tómen otbasylardyń balasy arman-tilegin jazyp qaldyrdy, dep habarlaıdy QazAqparat tilshisi.
Jobany JOO stýdentteri men jastar uıymdary uıymdastyrdy.
«Balalar úıi, qoǵamdyq qorlar, kóp balaly otbasylardan bólek bıyl balalar hospısi, múmkindigi shekteýli balalar tárbıelenetin balabaqshalar qosyldy», - dedi Charity Wish Tree jobasynyń uıymdastyrýshysy Azamat Qadyrbek.
Byltyr 1 200 balanyń jańa jyl shyrshasyna ilingen tilegi oryndalǵan bolatyn.
«Aıala» qaıyrymdylyq qorynyń shyrshasynda 500 hat ilinip tur. Kez-kelgen adam ol hatty ashyp oqyp, balanyń arman-tilegin oryndaı alady. 5 jyldan beri jalǵasyp kele jatqan jobanyń arqasynda 2 myńǵa jýyq bala syılyq aldy.
Al Talǵar qalasyndaǵy «Nur» balalar úıiniń 46 tárbıelenýshisiniń haty akademık Shahmardan Esenov atyndaǵy ǵylymı-aǵartý ortalyǵy janyndaǵy shyrshada ilinip tur.
«Biz ınternette balalardyń arman-tilegin jarııaladyq. 1 aıdyń kóleminde syılyqtardy jınap, poshta arqyly jan-jaqtan keletin sálemdemelerdi aıdyń ortasyna taman tapsyratyn bolamyz. Arman shyrshasy 7 jylda 200 balanyń armanyn oryndady», - dedi akademık Shahmardan Esenov atyndaǵy ǵylymı-aǵartý ortalyǵynyń baǵdarlamalar boıynsha úılestirýshisi Grıgorıı Lı.
