Almatylyq jup jańa týǵan nárestesin 2 mln teńgege satyp jibermek boldy
ALMATY. QazAqparat - Almatyda týǵanyna alty kún bolǵan qyzdy 24 jastaǵy kelinshek pen onymen birge turatyn 21 jastaǵy er adam 2 mln teńgege satpaq boldy. Atalǵan qylmysty jasady degen kúdikpen jeti adam qamaýǵa alyndy. Bul týraly Almaty qalalyq polıtsııa departamenti bastyǵynyń orynbasary Dıdar Ahanov málimdedi, dep habarlaıdy QazAqparat tilshisi.
«Jup áli týmaǵan balany satyp alýshylardy eki aı buryn izdeı bastaǵan. Balany Almaty qalasynyń turǵyndary alǵysy kelgen. Olar 48 jastaǵy Ý. esimdi azamat pen 46 jastaǵy E. esimdi áıel. Taraptar 2 mıllıon teńgege kelisken. Mámile ótken demalysta jasaldy. Alaıda, Krımınaldyq polıtsııa men Uıymdasqan qylmyspen kúres basqarmalary qyzmetkerleriniń qalanyń ár jerinde bir ýaqytta júrgizgen arnaıy is-sharasy kúdiktilerdiń josparyn buzdy. Alǵashqy bolyp qyzdyń bıologııalyq ata-anasy ustaldy. Odan keıin náresteni satyp almaq bolǵan adamdar jáne deldal erli-zaıyptylar ustaldy. Kelesi qadam aqshalaı syıaqy úshin balanyń qujattaryn rásimdeý mindetin óz moınyna alǵan 56 jastaǵy A. esimdi azamatshany ustaý boldy», – dedi ol.
Sondaı-aq polıtsııada náreste men mámileniń qalǵan somasyn bir-birine berý kezinde satyp alýshylar men deldaldardyń bir ýaqytta ustalǵanyn habarlady.
«Óte mańyzdy jaıt - kezdesý kezinde deldaldardyń qolynda taǵy eki sábı bolǵan. Boljam boıynsha 3 jáne jáne 7 aılyq balalar. Er adam bular ózderiniń balalary ekenin aıta bastady. Alaıda, olar balalardyń jeke basyn kýálandyratyn qujatty kórsete almady. Osylaısha, osy arnaıy is-sharanyń nátıjesinde kúdiktilerden úsh sábı alyndy. Olar medıtsınalyq mekemege tekserilý jáne qajet bolǵan jaǵdaıda kómek kórsetý úshin jetkizildi. Kúdiktiler bul balalardy «tiri» taýar retinde paıdalanýy múmkin ekenin joqqa shyǵarmaımyz. Tergeý mindetti túrde shyndyqty anyqtaıtyn bolady», – dedi Dıdar Ahanov.
Almaty qalalyq polıtsııa departamentiniń tergeý basqarmasynyń málimetinshe, atalǵan derek boıynsha QR QK-niń 135-baby 2-bóliginde kózdelgen qylmysqa sáıkes, sotqa deıingi tergeý bastaldy.
Kúdiktiler ýaqytsha ustaý ızolıatoryna qamaldy.
Foto: polisia.kz
