Almatylyq jolaýshy tasymaldaýshylar jiti tekserýden ótedi
ALMATY. 3 maýsym. QazAqparat /Erbol Azanbek/ - Almaty qalalyq jolaýshy tasymaly jáne avtokólik joldary basqarmasy «Ekspress trans» JShS-men № 35 baǵytty basqarý týraly kelisim-shartty úzdi. Atalǵan baǵyt konkýrs ótkizilgenge deıin basqa tasymaldaýshyǵa berildi.
Esterińizge sala keteıik maýsymnyń 1 kúni № 35 baǵyttaǵy A 639 EU nómirli avtobýs júrgizýshisi Abaı-Fýrmanov kósheleriniń qıylysynda jol polıtsııasynyń kóligimen soqtyǵysyp, polıtsııa qyzmetkeri aýyr jaraqat alǵan bolatyn. Qazirgi kezde aýrýhanada jatqan jol polıtsııasy batalon komandıriniń orynbasary A.Baıtursynovtyń jaǵdaıy óte aýyr dep baǵalanyp otyr. Jol boıyndaǵy beınebaqylaý kameralarynan avtobýs júrgizýshisiniń kináli ekendigin dáleldeıtin aıǵaqtar tabylǵan. Avtobýs rólinde 1988 jyly týǵan Rýslan Qalıev otyrǵan. "Ekspress trans" JShS júrgizýshini 2010 jyly jumysqa qabyldaǵany belgili boldy.
Osy oqıǵaǵa baılanysty Almaty qalalyq jolaýshy tasymaly jáne avtokólik joldary basqarmasy "Ekspress trans" JShS -men 35 baǵytty basqarý týraly kelisim-shartty úzdi. Basqarmanyń habarlaýynsha aldaǵy ýaqytta bul kompanııamen basqa baǵyttar boıynsha da kelisim-shart úzilip, basqa tasymaldaýshylarǵa berilmek. Sonymen qatar maýsym-shilde aılarynda barlyq jolaýshylar tasymaldaýshylardyń jumysy jiti teseriletin bolady.
