Almatylyq jigit órtengen úıdiń ishinde qalyp qoıǵan qart adamdy qutqardy
ALMATY. QazAqparat - Almatynyń 30 jastaǵy turǵyny Erkebulan Janahmetov óz ómirin qaýipke tigip, órtengen úıdiń ishinde qalyp qoıǵan qart adamdy qutqardy, dep habarlaıdy QazAqparat tilshisi.
Almaty qalalyq tótenshe jaǵdaılar departamenti 20 qarashada tańǵy 05:20-da Naýryzbaı aýdanynyń «Shuǵyla Sıtı«340/ 4 turǵyn úı kesheniniń páteri órtengenin habarlady.
«Oqıǵa ornyna jetken sátte toǵyz qabatty turǵyn úıdiń birinshi qabatynda ornalasqan páterdiń jıhazdary men múlikteriniń 16 sharshy metr aýmaǵy órtengeni anyqtaldy. Qatty tútin saldarynan turǵyndardyń ómiri men densaýlyǵyna qaýip tóndi. Gaz-tútinnen qorǵaý qyzmeti páterlerde qalǵan turǵyndardy evakýatsııalaýǵa jáne órtti sóndirýge kiristi. Qabyldanǵan sharalardyń arqasynda órt 10 mınýttan soń oqshaýlanyp, tańǵy 5:47-de tolyq sóndirildi», - dep habarlady TJD.
Sondaı-aq TJD-nyń málimetinshe, órt sóndirý bólimsheleri kelgenshe osy turǵyn úı kesheniniń 30 jastaǵy turǵyny Erkebulan Janahmetov óz ómirin qaterge tigip, operatsııadan keıin ózdiginen qozǵala almaıtyn qart kisini órtten qutqarǵan.
Erkebulannyń aıtýynsha, ol birinshi qabattaǵy páterinde otyryp kómek suraǵan daýysty estigen. 72 jastaǵy er adam páteriniń kireberisine jaqyndap, páterden ketýge tyrysqan.
«Tańǵa qaraı uıqym kelmeı, terezeni ashtym. Sol sátte kórshi korpýstan shyǵyp jatqan órtti baıqap, adamdarǵa kómektesý úshin sol jerge júgirdim. Aldymen gaz qubyrynyń qaqpaǵyn japtym. Kórshi jigit nemese kýáger syrtqy esikti taspen tirep, kireberistiń esigin ashty. Tútin basqan kireberisten bireýdiń kómek suraǵan álsiz daýysyn estidim. Syrtqa shyǵyp kýágerlerlerge birge kirýdi suradym. Biraq, eshkim barmady. Kireberiste dem alý múmkin emes boldy. Murnymdy kepkamen jaýyp, órtengen páterge kirip, ol jerden qart kisini qaýipsiz jerge shyǵardym. Batyr ataný meniń maqsatym emes, tek kómekteskim keldi», - dedi Erkebulan Janahmetov.
«Qazirgi ýaqytta qutqarylǵan 72 jastaǵy er adam Jedel medıtsınalyq kómek aýrýhanasy dárigerleriniń baqylaýynda. Onyń ómiri men densaýlyǵyna qaýip joq.
Almaty qalasy TJD basshylyǵy QR TJ mınıstrligine Almaty qalasynyń 30 jastaǵy turǵyny Janahmetov Erkebulandy marapattaýǵyea usynys engizdi», - dep habarlady qalalyq TJD baspasóz qyzmeti.
