Almatylyq jedel járdem júrgizýshileriniń shaǵymyna dırektorlary jaýap berdi
ALMATY. QazAqparat – Almatynyń jedel járdem qyzmeti júrgizýshilerdiń shaǵymyna jaýap berildi, dep habarlaıdy QazAqparat tilshisi.
Aıta keteıik, birqatar buqaralyq aqparat quraldarynda jedel járdem stantsııasynda isteıtin 20 shaqty júrgizýshi sársenbi kúni «Halyq parki» aldyna jınalyp, narazylyq bildirgeni týraly jazyldy. Olar ústemaqynyń keshiktirilgenine, kólikke qajet quraldar men bólshekterdi óz qaltasynan aqsha shyǵaryp, satyp alatyndyǵyna shaǵymdandy. Jumysshylar sonymen birge máseleni kótergen belsendilerdiń qýdalaýǵa ushyraı bastaǵanyn da aıtqan.
«18 mamyrda bizdiń bir júrgizýshige qatysty tártiptik keńes ótti. Onyń nátıjeleri boıynsha esh sebepsiz bes kún jumys ornynda bolmaǵan júrgizýshini jumystan bosatý týraly sheshim qabyldandy. Eńbek kodeksine sáıkes, dırektordyń orynbasary, zańger, sarapshy, kadr qyzmetiniń mamany kiretin tártiptik komıssııasy eńbek kelisimshartyn buzý týraly sheshim shyǵardy», - dep túsindirdi Jedel járdem qyzmeti dırektorynyń mindetin atqarýshy Erbol Sársenbaev.
Spıkerdiń aıtýynsha, júrgizýshi komıssııa sheshimimen kelispegen. Al onyń áriptesteri, 20 adam ákimdikke shaǵymdanǵan. Olarǵa jaǵdaı tolyq túsindirildi. Másele sheshildi. Sońynda olar keshirim surady.
Sonymen qatar, ol kólikterdi óz esebinen jóndeýge qatysty shaǵymdarǵa da jaýap berdi.
«Mundaı jaǵdaı erterekte bolǵan edi. Qazirgi ýaqytta men kún saıyn tańerteń avtojóndeý sheberhanasy men bas ınjener usynǵan barlyq esepterdi, aktilerdi usyna alamyn. Osy anyqtamaǵa sáıkes, barlyq kólikter jóndeý sheberhanalarynda qysqa jáne uzaq merzimdi jóndeýden ótedi. Qazir bizdiń kólik parkimiz jańa. 2020 jyly 140 jańa jedel járdem kóligi satyp alyndy. Olardyń 100-i qazir iske qosyldy. Qalǵan 40 kólik qyrkúıekten bastap qyzmette qoldanylady. Almaty qalasynyń turǵyndaryna medıtsınalyq qyzmet kórsetetin 200 kólikten basqa, bizde rezervtik kólikter bar. Kez kelgen kólik buzylady, mundaı jaǵdaıda jedel járdem brıgadasy rezervtegi kólikke otyrady. Al buzylǵan kólik avtojóndeý oryndaryna jiberiledi», - dedi ol.
Erbol Sársenbaev júrgizýshilerge beriletin ústemeaqy týraly da aıtty.
«Olar ústemeaqyny alyp otyr. Sondaı-aq, mamyr aıynda qala ákimdigi densaýlyq saqtaý mınıstrliginiń qaýlysynda engizilmegen qyzmetkerlerge qosymsha qarajat bóldi, óıtkeni olar osy epıdemııaǵa qarsy sharalarǵa qatysty. Densaýlyq saqtaý mınıstrliginiń buıryǵyna sáıkes epıdemıologııalyq sharaǵa qatysýshylar úsh sanatqa bólindi. Júrgizýshiler úshinshi sanatqa, al feldsherler men dárigerler ekinshi sanatqa jatady», - dedi ol.
