Almatylyq jastarǵa dinı jat aǵymnyń qaýip-qateri túsindirildi
Almaty qazaq-túrik gýmanıtarlyq tehnologııalyq kolledj stýdentterine, ál-Farabı atyndaǵy QazUÝ dintaný jáne mádenıettaný kafedrasynyń oqytýshysy Qalımash Begalına dáris oqydy. Dáriske 300-den astam jas qatysty.
Lektordyń aıtýynsha, destrýktıvti dinı aǵymdar dástúrli ıslam dininiń atyn jamylyp halyqty aldaıdy. Olar ún paraqtar taratý arqyly ózderiniń úgit-nasıhattaryn júrgizedi.
«Búgingi tańda bolyp jatqan ekonomıkalyq, saıası, aqparattyq, mádenı jáne dinı keńistiktiń jahandanýy álemdik úrdisterdiń mańyzdy faktory bolyp tabylady. Bul qubylys jaǵymdy aspektilermen qatar belgili bir negatıvti jaǵdaılarǵa da ákeledi. Adamzat ótken ǵasyrdaǵy qyrǵı-qabaq soǵys kezeńiniń qorqynyshtaryn basynan keshirip, endi tynyshtyq zamanǵa qol sozyp otyrǵanda, taǵy da jańa búkilálemdik máselemen teketiresti. Endi qazirgi álemniń aldyndaǵy ózekti máseleler halyqaralyq ekstremızm men lańkestiktiń agressıvti kórinisteri»,- dedi Qalımash Begalına.
Stýdenttermen kezdesý barysynda ol, Qazaqstan – azamattardyń óz dúnıetanymyn tańdaýda tek zańnama retinde emes, is júzinde teń quqyly múmkinshilikti keńinen bergen zaıyrly memleket. Qoǵamda eshqandaı qundylyqtarda monopoldik (birtutastyq) quqyq joq, barlyq azamattarǵa rýhanı izdeniste óz oılaryn júzege asyrýǵa túgel jaǵdaı jasalǵanyn atap ótti.
«Qazaqstanda bilim berý zaıyrly sıpatta bolǵanymen, qazirgi áleýmettik jaǵdaıda ǵylymnyń da, dinniń de gýmanıtarlyq qyzmetiniń jalpy mindeti aǵartý qyzmeti ekenin barlyǵymyz bilemiz. Bizdiń eldiń turǵyndary teń quqyly. 130 ult ókili bir shańyraq astynda tatý tátti ómir súrip jatyr. Alaıda, osy tynyshtyqty buzǵysy keletin jat aǵymdar bar. Olardyń maqsaty ózderiniń qataryn kóbeıtý. Adamdardy aldap, týra joldan taıdyrý bolyp otyr. Sondyqtan ondaı destrýktıvti dinı aǵymdardan aýlaq bolǵan jón. Ásirese jastar sizder ár qadamdaryńyzdy ańdap basýlaryńyz kerek. Eger dinge qatysty suraqtaryńyz bolsa, áleýmettik jeliden emes naǵyz mamandardan suraǵan abzal»,- deıdi dintanýshy.
Dáriske qatysqan jastardy jat aǵymdardyń kózdegeni men hıdjab máselesi tolǵandyrdy. Osy taqyrypta saýaldar kóptep qoıyldy. Olarǵa lektor tushymdy jaýap berdi.
Aıta ketý kerek, bul dárister Almaty qalalyq Qoǵamdyq damý basqarmasynyń uıymdastyrýymen ótip jatyr.
