Almatylyq jastar nesıeni jeńildikpen qalaı ala alady

ALMATY. QazAqparat - Almatyda jastar úshin 2,5 paıyzdyq mólsherlememen shaǵyn nesıe alýǵa ótinim qabyldanyp jatyr. Bul týraly óńirlik kommýnıkatsııalar qyzmetinde ótken baspasóz máslıhatynda «Agrarlyq kredıttik korporatsııa» AQ nesıeleý bóliminiń bas mamany Qanat Omarov aıtty, dep habarlaıdy QazAqparat tilshisi.

Spıkerdiń sózinshe, negizgi talaptardyń ishinde ótinim berý sátinde jeke kásipker retinde tirkelý merzimi 5 jyldan aspaýǵa tıis. 21-35 jas aralyǵyndaǵy jas kásipkerler men jumysshy jastar jeńildetilgen nesıe alýǵa úmitker bola alady.

«Osy baǵdarlamamen Qazaqstan Respýblıkasy boıynsha 28,9 mlrd teńge bólindi, onyń ishinde Almaty jastary úshin 4,8 mlrd teńge bólindi. Bul – myńǵa jýyq kásipker men jastar. Almaty qalasy boıynsha 350 kásipker men jastarǵa keńes berildi, 71 kásipker boıynsha ótinimder qabyldandy, olardyń tórteýi komıssııanyń qaraýyna jiberildi», - dedi Qanat Omarov.

Aıtýynsha, shaǵyn nesıe somasy mal sharýashylyǵy salasyndaǵy jobalar úshin – 7 jylǵa deıin, bıznestiń basqa baǵyttary úshin – 5 jylǵa deıin. Nesıe somasy – 5 mln teńge.

«Shaǵyn nesıe merziminiń uzaqtyǵynyń úshten birine deıingi negizgi borysh pen syıaqyny óteý boıynsha jeńildikti kezeń kózdelgen. Kepilmen qamtamasyz etýdiń bolýy mindetti shart. Kepilmen qamtamasyz etý túrinde jyljymaly jáne jyljymaıtyn múlik qabyldanady. Kepilmen qamtamasyz etý bolmaǵan jaǵdaıda úshinshi tulǵalardy kepil berýshi retinde tartýǵa bolady (ata-analary, týystary jáne taǵy basqalary)», - dedi ol.

Nesıeleý boıynsha sheshimdi qala ákimdigi janynan qurylǵan arnaıy komıssııa qabyldaıdy. Komıssııaǵa qalalyq máslıhat depýtattary, memlekettik organdardyń, «Atameken» kásipkerler palatasynyń, bıznes-qoǵamdastyq pen BAQ ókilderi kiredi.

Qajetti qujattar tizimi:

1. jeke basyn kýálandyratyn qujat

2. joba boıynsha bıznes-jospar

3. shottyń bolýy týraly qyzmet kórsetetin bankten anyqtamalar

4. qarjy uıymdarynan (kredıtter bolǵan kezde) kredıttik bereshektiń, onyń ishinde merzimi ótken bereshektiń bolýy týraly anyqtamalar

5. qatysýshynyń/úmitkerdiń jalaqysyn jáne (nemese) ózge de tabystaryn rastaıtyn qujat (jınaqtaýshy zeınetaqy qorynan úzindi kóshirme) bolǵan kezde

6. kepildi qamtamasyz etý retinde beriletin múlikti baǵalaý týraly esep

7. kepil berýshi jáne kepilmen qamtamasyz etý jónindegi qujattar.

Qujattardy «Agrarlyq nesıe korporatsııasy» AQ (Sátbaev kóshesi, 5) fılıalyna tapsyrý qajet. Shaǵyn nesıeler boıynsha tolyq aqparatpen korporatsııa agrocredit.kz.saıtynda tanysýǵa bolady.