Almatylyq jas ǵalymdar 5G baılanysyn jasaýda
Atap aıtqanda, qala kóshelerindegi jaryqtandyrý jelisiniń avtomattandyrylǵan júıege kóshkenin aıtýǵa bolady. Kóshedegi jaryqtandyrý júıesi tań qylań bere avtomatty túrde ózi óshedi.
Bul jańalyq QR Tuńǵysh Prezıdenti janyndaǵy jas ǵalymdar keńesi músheleriniń eńbeginiń jemisi.
Búginde jas ǵalymdar taǵy basqa jańa tehnologııalardy engizýdi josparlap otyr.
Bolashaqtaǵy josparlarymen Almaty energetıka jáne baılanys ýnıversıtetinde ótken jıyn barysynda Jas ǵalymdar keńesiniń tóraǵasy Mahmut Tomanov bólisti.
«4,0 ónerkásibi barlyq salanyń tsıfrlandyrylýyn bildiredi. Biz ındýstrııalandyrý zamanyna saı básekege qabiletti maman daıyndaýymyz kerek. Sonymen qatar, joldaýdyń onynshy mindeti - Smart Sıtı máselesi bizdi óte qyzyqtyrady. Eń aldymen tujyrymdama boıynsha Astana tolyq tsıfrlandyrylýy tıis. Odan soń Almaty, Shymkent taǵy basqa qalalar jańa tehnologııalarmen jabdyqtala bastaıdy. Bizdiń jas ǵalymdardyń ǵylymı jańalyqtarda sórelerde jatpaı, óndiriske engizilýi tıis. Almatyda qazir kósheni jaryqtandyrý baǵandarynda datchıkter ornalasqan. Olar avtomatty túrde tań qylań bere ózderi jaryqty óshiredi. Sonymen qatar jas ǵalymdar «Qazaqtelekom» AQ pen birige otyryp, baılanysty 5G formatyna kóshýdiń ǵylymı jumystaryn jasap jatyr. ıAǵnı, TV jaqyn arada joǵalýy múmkin. Jyldamdyǵy sekýndyna 300 Mbt bolatyn vıdeokontentti endi uıaly telefon arqyly da kórýge bolady. Osy tehnologııa arqyly shalǵaıdaǵy mamandarmen baılanysyp qashyqtan jumys jasaýǵa bolady. Mysaly bul joba Qashaǵan ken ornynda jumys jasaýǵa múmkindik beretin bolady», - dedi Elbasy qory janyndaǵy jas ǵalymdar keńesiniń tóraǵasy, ekonomıka ǵylymdarynyń kandıdaty Mahmut Tomanov.
Onyń aıtýynsha, qazir Almaty Energetıka jáne baılanys ýnıversıtetinde 3 myńnan asa jas ǵalym bar. Olardyń biri Aıbek Muratuly elektr energııasyn tapshylyq bar oblystarǵa taratýǵa múmkindik beretin shýnttaý reaktoryn oılap tapqan.
Jas ǵalym men ǵylymı jetekshisi ekeýi qondyrǵyny zaýyttan shyǵarýǵa grant utyp aldy.
«Bizde soltústik aımaqta elektr energııasynyń kózi kóp. Al ońtústikte tapshylyq bar. Bul qondyrǵy jelilerde ornatylyp, elektr energııasyn ońtústikke ótkizý qabiletin arttyrady. Sonymen qatar, qondyrǵy Reseıdegi balamalarynan arzan túsedi, jańa jumys kózderi ashylady», - dedi Aıbek Muratuly.
Al QR Tuńǵysh Prezıdenti qory janyndaǵy Jas ǵalymdar keńesinde 18 ǵalym ár salada eńbektenip keledi.
Aıta ketken jón, búgingi jıyn barysynda oqý ornynyń ujymy Memleket basshysynyń Qazaqstan halqyna «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» joldaýyndaǵy mańyzdy máselelerdi talqylady.
