Almatylyq jáne astanalyq týrkompanııalar Tarazdyń tarıhı oryndarymen tanysty
Atalmysh shara aımaqtardyń týrıstik áleýetin tanytyp, týroperatorlardy óńirlerdegi ahýal jáne týrıstik nysandarmen tanystyrý maqsatynda qolǵa alynǵan. Onyń aıasynda aqparattyq týr músheleri eń aldymen Jambyl oblysynyń ortalyǵy – Taraz qalasyna at basyn burdy.
Oblystyq týrızm basqarmasy mamandarynyń jol nusqaýymen Almaty jáne Nur-Sultan qalalarynyń týroperatorlary Tarazdaǵy «Jeńis», Q.Rysqulbekov atyndaǵy saıabaq pen «Jeltoqsan» alleıasyna baryp, elimizdegi eń uzyn sýburqaqpen jáne Baýyrjan Momyshuly eskertkishimen jáne «Dańq» zalymen tanysty. Sondaı-aq, týr baǵdarlamasy boıynsha «Qarahan», «Dáýitbek», «Aısha bıbi», «Babadja Hatýn» keseneleri men ózge de tarıhı mańyzy bar nysandardy aralady.
«Eki kún boıy biz qonaqtarǵa tarıhı oryndar men jańa týrıstik nysandardy kórsetip, barynsha keri baılanys ornatýǵa tyrystyq. Óıtkeni dál osy týrfırmalar bizdiń óńirdi unatsa, erteńgi kúni osylar bizge sheteldik jáne qazaqstandyq týrısterdi alyp keledi. Mundaı aqparattyq týrlardyń týrıster sanyn kóbeıtýde mańyzy zor. Bizdiń óńirdiń týrıstik áleýetin joǵary baǵalap, Jambyl oblysynyń týrızmine óz úlesin qosyp jatqan «Kazakh Tourism» ulttyq kompanııasyna zor alǵys aıtamyz»,-deıdi oblystyq týrızm basqarmasynyń basshysy Qarlyǵash Aralbekova.
Aıta keteıik, respýblıkalyq aqparattyq týr bıyl ekinshi ret uıymdastyrylyp otyr. Buǵan deıin mamyr aıynda ótkizilgen aqparattyq týrda elimizdiń batysyndaǵy 4 aımaqtan jınalǵan týroperatorlar Nur-Sultan – Býrabaı – Shymkent – Saryaǵash – Almaty – Almaty oblysy – Shyǵys-Qazaqstan oblysy baǵyttary boıynsha sapar shekken bolatyn.
Taraz-Shymkent-Saryaǵash-Túrkistan-Aqtaý baǵyty boıynsha aqparattyq týr qarashanyń 9-na deıin jalǵasyp, Aqtaý qalasynda túıindeledi.
