Almatylyq zeınetker abaısyzda óz úıi men kóligin órtep jiberdi
ALMATY. QazAqparat - Aýlasyndaǵy qoqysty órtemek bolǵan zeınetker baıqaýsyzda óz úıin, kóligin jáne kórshisiniń garajyn otqa orady, dep habarlaıdy QazAqparat tilshisi.
Tótenshe jaǵdaı 14 tamyz kúni oryn alǵan.
Almaty qalalyq Tótenshe jaǵdaılar departamentiniń «101» pýltine Shýhov kóshesindegi №2 J úıiniń otqa oranǵany týraly habarlama 14 tamyz kúni saǵat 14:30-da tústi. Órt sóndirý brıgadasy oqıǵa ornyna birneshe mınýtta kelip jetti. Saǵat 15:03 órt oqshaýlanyp, saǵat 15:24-te tolyqtaı sóndirildi.
« Órt 100 sharshy metr aýmaqty sharpyǵan.Úıdiń shatyry, aýlada turǵan «Toıota» avtokóligi jáne kórshiniń garajy órtengen. Taǵy bir kórshi úıdiń qasbeti men shatyryna da ot tıgen. Zardap shekkender joq»,- dep habarlady Almaty qalalyq TJD baspasóz qyzmeti.
Úı ıesiniń kinási dáleldense, ákimshilik jazaǵa tartylýy múmkin. Qazir osy oqıǵa boıynsha mamandar tekserý jumystaryn júrgizip jatyr.
