Almatylyq volonterler órtengen ákimdik ǵımaratyn tazalaýǵa kómektesip jatyr

ALMATY. QazAqparat - Almaty ákimdigi ǵımaratyn órtten keıingi tazartý jumystary jalǵasyp jatyr. Búgin kómekke qalanyń volonterleri keldi, dep habarlaıdy QazAqparat tilshisi.

HAQ qoǵamdyq qozǵalysynyń jetekshisi Toǵjan Qojalıevanyń aıtýynsha, senbilikke túrli uıymdardan 150-den astam erikti jumyldyryldy.

«Atap aıtar bolsam, «Qyzyl krest», «Jansaıa Ábdimálik shahmat akademııasy», Lider.kz, HAQ qoǵamdyq qozǵalysy, «Narkostop», «Jas Otan» jastar qanatynyń músheleri, sondaı-aq kaskaderlar men Almaty qalasynyń qamqor azamattary jumyldyryldy. Olardyń barlyǵy aldyn ala jazyldy, bizde tizim bar. Olar óz erkimen keldi, qalany qalpyna keltirýge úles qosqysy keledi. Kóbinese jastar. Bul óte qýantady. Biz ákimdik ǵımaratynyń úshinshi qabatyn tazalap jatyrmyz», - deıdi Toǵjan Qojalıeva.

Spıkerdiń sózinshe, basty maqsat – kúshimiz birlikte ekenin kórsetý.

«Biz elimizge, súıikti qalamyzǵa kómekteskimiz keledi», - dep qosty ol.

Aıta keteıik, 13 qańtarda órtten keıin ákimdik ǵımaratyn tazartý jumystary bastaldy. Oǵan shamamen 660 adam jumyldyryldy. Qıraǵan jıhaz, keńse tehnıkasy, qoqys jınalyp, kádege jaratý úshin polıgondarǵa shyǵarylady.

Buǵan deıin QazAqparat tilshileri órtengen qala ákimdiginiń ǵımaratynda bolyp, nysannyń syrty men ishin kórsetken bolatyn.

Jaıly qalalyq orta basqarmasynyń basshysy Sapar Nurashev órtten zardap shekken qalalyq ákimdik ǵımaraty qashan qalypqa keltiriletinin aıtty.

Onyń aıtýynsha, qazirgi ýaqytta ǵımarat ishinde órt saldarynan tazartý jumystary júrgizilip jatyr. Buǵan shamamen eki-úsh kún ketedi. Jumys kólemi óte úlken. Aldaǵy ýaqytta ony 100 paıyz qaıta qalpyna keltiremiz. Tehnıkalyq tekserý júrgiziledi. Oǵan taǵy 10 kún ketedi. Osydan keıin mamandar ǵımaratty qalpyna keltirý boıynsha jobalaý-smeta qujattamasyn ázirleıdi.

Qalpyna keltirý jumystary shamamen 5-6 aıǵa sozylady. Bıýdjet áli anyqtalǵan joq