Almatylyq volonterler memlekettik rámizder kúnine fleshmob ótkizdi

ALMATY. QazAqparat - Almaty qalasynyń jastar resýrstyq ortalyǵynyń 30-ǵa jýyq belsendisi QR Memlekettik rámizder kúnine oraı «Meniń týym» atty erekshe fleshmob ótkizdi, dep habaraıdy QazAqparat tilshisi.

Memlekettik rámizder kúnine oraı megapolıs jastary eń tanymal kólik túri – elektrsamokatpen Almatynyń basty kóshelerimen tý ustap júrip ótti.

Eriktiler «Suńqar» halyqaralyq shańǵy tramplın kesheninen ál-Farabı kóshesine deıin júrdi.

Almaty qalasy jastar resýrstyq ortalyǵynyń belsendisi Mahambet Baýyrjannyń aıtýynsha, bul aktsııa qalanyń árbir turǵyny men qonaǵynyń júregine ún qosady.

«Jastar úshin Tý, Eltańba, Ánuran Qazaqstan táýelsizdiginiń nyshany. Bizdiń árqaısymyz tý ustaǵan kezde erekshe jaýapkershilikti sezinemiz. Biz óz qurmetimizdi osylaı kórsetýdi sheshtik. Árbir qala turǵyndaryn memlekettik rámizderdi qurmetteýge shaqyramyn», - dedi jastar belsendisi Mahambet Baýyrjan.