Almatylyq voleıbolshylar Ulttyq lıgadaǵy el chempıonatynda kóshbasshylyqty qaıta qolyna aldy
ALMATY. 11 aqpan. QazAqparat - Óskemende voleıboldan Ulttyq lıgadaǵy erler komandalary arasynda HHI QR chempıonatynyń úshinshi týryndaǵy úshinshi kezdesýde «almatylyqtar» atyraýlyq basty qarsylasynan 3 upaıǵa uzap shyqty.
Eske salaıyq, jarystyń alǵashqy eki kúniniń qorytyndysy boıynsha "Almaty" men "Atyraý" komandalary týrnır kestesinde 28 upaımen qatar kele jatqan edi. Alǵashqy 2 týrda «pavlodarlyqtardan» 3:0, 3:1 esebimen basym túsken «atyraýlyqtar» keshe kútpegen jerden 1:3 esebimen jeńilis tapty. «Almatylyqtar» óskemendikterdi («Shyǵys-QorǵasynQurylys») 3:0 esebimen oısyrata jeńip, jeńisti serııasyn (3:0, 3:1) odan ary jalǵastyrdy. Al úzdik úshtikti túıindep turǵan Oraldyń «Kondensaty» qyzyljardyń «Esilin» 3:1 esebimen utyp, 27 upaımen atyraýlyqtardy ókshelep keledi. Oraldyqtar qyzyljarlyqtarǵa 1-shi týrda 2:3 esebimen utylyp, 1 upaıdy qanaǵat tutsa, 2-shi týrda 3:0 esebimen oısyra utyp, 3 upaıdy túgel óz qorjynyna salǵan edi.
Búgin endi «Pavlodar» men «Esil», «Almaty» men «Atyraý», «TNK Qazhrom» (Hromtaý) men «Shyǵys-qorǵasynQurylys» ózara kúsh synasady. Pavlodarlyqtar óz qarsylasyna buǵan deıin 2 ret 3:1 bolyp utylsa, almatylyqtar atyraýlyqtardy 3:0, 3:1 esebimen jeńip, óz basymdyǵyn tanytqan. Hromtaýlyqtar bolsa alǵashqy týrda 3:0 esebimen jeńgenimen, ekinshi týrda 2:3 bolyp jeńilip, upaı bólisken edi. Erteń komandalar bir kún tynyǵyp, 13-15 kúnderi jarysty odan ári jalǵastyratyn bolady.
