Almatylyq voleıbolshylar Ulttyq lıgadaǵy áıelder komandalary arasyndaǵy kóshbasshylardyń birin upaı bólisýge májbúr etti
ALMATY. 26 qańtar. QazAqparat - Şýchınsk qalasynda voleıboldan Ulttyq lıgadaǵy áıelder komandalary arasynda HHІ Qazaqstan chempıonatynyń 3-shi týryndaǵy «Almaty» men «Astana» arasyndaǵy kezdesý 2:3 esebimen aıaqtaldy.
Alǵashqy 2 týrdyń qorytyndysy boıynsha 8 oıynda 5 upaımen týrnır kestesinde kósh sońynda qalyp qoıǵan almatylyqtar 15 upaımen 2-shi satyda turǵan astanalyqtardan 1 upaı oljalady. Al 3-shi satyda turǵan «qaraǵandylyqtar» ózderin ókshelep kele jatqan pavlodarlyqtardy («Ertis-Qazhrom») 3:0 esebimen oısyrata utty. Búgin endi «Almaty» men «Ertis-Qazhrom», «Jetisý» (Taldyqorǵan) men «Astana» ózara kúsh synasady. «Jetisýlyqtardyń» el chempıonatynda 2011 jyldan beri qarsylas shaq keltirmeı júrgenin jáne bul maýsymda da 8 oıynnan keıin 23 upaımen kóshbasshylyq tizgindi óz qolyna berik ustap kele jatqanyn eskersek, astanalyqtarǵa bul kezdesý ońaıǵa túspeıtin sııaqty. Kósh sońyndaǵy komandamen upaı bólisken olardyń bul saıysta jeńiske jetýi óte qıyn.
