Almatylyq voleıbolshylar el chempıonatyndaǵy basty qarsylasyn úshinshi ret oısyrata utty
ALMATY. 12 aqpan. QazAqparat - Óskemende voleıboldan Ulttyq lıgadaǵy erler komandalary arasynda HHI QR Chempıonatynyń 3-shi týryndaǵy alǵashqy tórt kúnniń qorytyndysy boıynsha «almatylyqtar» ózderin ókshelep kele jatqan «atyraýlyqtardan» 6 upaıǵa uzap ketti.
Olar keshe basty qarsylasyn 3:0 esebimen oısyrata utyp, osymen úshinshi ret upaısyz qaldyrdy. Buǵan deıingi eki kezdesý 3:0, 3:1 esepterimen aıaqtalǵan bolatyn.
Qazir «Almaty» 15 kezdesýden keıin 34 upaımen týrnır kestesindegi kóshbasshylyq tizgindi eshkimge ustatar emes. Odan bir oıyny artyq «Atyraýda» - 28 upaı bar. Atyraý komandasynan keıin 1 upaıy ǵana kem «Kondensat» (Oral) pen «Pavlodar» (Pavlodar) ornalasyp otyr. Eger oraldyqtardyń bir oıyny kem ekenin eskersek, atyraýlyqtarǵa endi óz ornyn saqtap qalý aıtarlyqtaı qıyndyq týdyrýy múmkin. Al Hromtaýdyń «TNK Qazhromynda» - 26, Qyzyljardyń «Esilinde» - 10 jáne Óskemenniń «Shyǵys-QorǵasynQurlysynda» 10 upaı bar.
Búgin barlyq komandalar bir kún tynyǵyp, 13-15 aqpan kúnderi úshinshi týrdyń qalǵan oıyndaryn ótkizedi. Onda erteń «Esil» men «Almaty», «Atyraý» men «TNK Qazhrom», «Kondensat» pen «Pavlodar» kúsh synasady. Buǵan deıin almatylyqtar qyzyljarlyqtardy 0:3, 2:3, atyraýlyqtar hromtaýlyqtardy eki ret 3:2, al oraldyqtar pavlodarlyqtardy 3:0, 3:2 esebimen jeńgen bolatyn.
