Almatylyq ustazdarǵa naýqas oqýshynyń ómirin arashalap qalatyn qurylǵy tanystyryldy
ALMATY. QazAqparat - Almatynyń Qoǵamdyq Keńesi mekteptegi qaýipsizdik taqyrybynda jıyn ótkizip, oqýshy men stýdentti ajaldan arashalap qalatyn qurylǵyny tanystyrdy, dep habarlaıdy QazAqparat tilshisi.
Almatydaǵy «Turan» ýnıversıtetinde qalalyq Qoǵamdyq keńes mektep oqýshysynyń qaýipsizdigi taqyrybynda jıyn ótkizdi. Jıynda «Aq júrek» Qoǵamdyq qorynyń dırektory Rýslan Mashýtov adam kúndelikti ómirinde kútpegen jerden júrek talmasyna ushyraǵan kezinde jedel járdem kelgenge deıin kórsetiletin medıtsınalyq kómek týraly baıandady. Onyń aıtýynsha, sońǵy ýaqytta mundaı oqıǵa Qazaqstandaǵy mektep oqýshylary arasynda da kezdesip otyr.
«Dúnıejúzilik densaýlyq saqtaý uıymynyń málimetine súıensek, apta saıyn 1 mln adamǵa shaqqanda orta eseppen 30 adamnyń júregi aıaqasty toqtap qalady. Eger Qazaqstanda 17 mln turǵyn bar dep eseptesek, onda apta saıyn elimizde 500 adamnyń júregi kútpegen jerden toqtap, qaıǵyly jaǵdaıǵa ushyrap jatady. Al jyl saıyn, elimizde 26 myń adam júrek talmasy boıynsha medıtsınalyq kómekke muqtaj. Osy 26 myń oqıǵanyń 80 paıyzynda adamdar medıtsınalyq ǵımarattan tys jerde, ıaǵnı jumysta, sportpen shuǵyldanyp jatqanynda, úıde nemese kez kelgen jerde qaıǵyly jaǵdaıǵa dýshar bolady. Bul medıtsınalyq emes, áleýmettik problemaǵa aınaldy», - degen Rýslan Mashýtov Qazaqstanda mektep oqýshylarynyń da júrek talmasyna shaldyǵyp jatatynyn aıtty.
«Byltyrǵy oqý jylynda Astana qalasyndaǵy 84 mektep boıynsha 2 oqıǵa tirkeldi. 1 oqýshy dene shynyqtyrýda qaza tapsa, ekinshi oqýshynyń keýde tusynan urǵandyqtan mert boldy. Qazaqstanda naqty statıstıkany keltirý múmkin emes. Sebebi, bul másele BAQ arqyly jıi aıtylmaıdy. Shamamen, 10-15 oqýshy Qazaqstan boıynsha júrek talmasyna ushyrap jatady. Naqty statıstıka keltire almaıtyn taǵy sebep, jedel járdem kelgen ýaqytta naýqas dúnıeden ótip ketedi. Aıaq asty júregi toqtaǵan adamǵa alǵashqy eki mınýtta kómek kórsetilmese, ol qaıtys bolady. Sondyqtan, bul statıstıka bizde naqty emes», - dedi ol.
Rýslan Mashýtovtyń aıtýynsha, osyndaı sebepterdiń aldyn alý úshin barlyq mektepterge júrek toqtaǵan kezde kómek kórsetetin qurylǵy - defıbrıllıator alý qajet.
«Biz defıbrıllıatordy ornatý týraly usynysty birini «Nur Otan» partııasyna aıttyq, qoldady. Premer-Mınıstr Saǵyntaevqa da kórsetip, qoldaý taptyq. Bizdiń joba «Qaýipsiz mektep, qaýipsiz joǵary oqý orny» dep atalady. Maqsatymyz - barlyq oqytýshy quramdy alǵashqy medıtsınalyq kómekke úıretý. ıAǵnı, júrek toqtaǵan jaǵdaıda, alǵashqy 2 mınýt ishinde kómek kórsetýdi medıtsınalyq bilimi joq adamdarǵa úıretemiz», - dedi ol.
Búgingi tańda Astana qalasynda №59-shi mektep alǵashqylardyń biri bolyp qurylǵyny satyp alǵan. Rýslan Mashýtov byltyrǵy oqý jylynda 7-shi synyp oqýshysy dene shynyqtyrý sabaǵy barysynda dál osy mektepte kóz jumǵan. Endi mamandar defıbrıllıatordy Almatynyń barlyq mektepterine satyp alý qajet degen usynystaryn qalalyq ákimdikke jetkizbek.
Eske sala keteıik, «Almaty - 2020» damý baǵdarlamasynda Almatyda bala ólimi 2010 jyldan bastap, 2 esege tómendegen. ıAǵnı árbir týylǵan 1000 balanyń 8-inde osyndaı jaǵdaı boldy, munyń ózi Máskeýdegi kórsetkishke sáıkes keledi, alaıda Berlındegimen (4), Torontodaǵymen salystyrǵanda 1,6 esege kóp. 2020 jyly bala óliminiń deńgeıin 6,7 jaǵdaıǵa deıin tómendetý josparlanyp otyr
