Almatylyq ustazdar Arys turǵyndaryna gýmanıtarlyq kómek kórsetti
Onyń derekterine qaraǵanda, quramynda oqý ornynyń prorektory, fakýltet dekandary men Medıa departamentiniń qyzmetkerleri bar top Shymkent qalasynda arystyq azamattarǵa arnalyp ashylǵan 10-ǵa jýyq evakýatsııalyq beketterge arnaıy baryp, turǵyndarǵa ýnıversıtet ujymynyń qoldaýymen alynǵan kıim-keshek, azyq-túlik jáne kúndelikti qajetti turmystyq zattardy tabystady.
Sonymen qatar atalǵan oryndarda Qyzdar ýnıversıtetiniń Pedagogıka jáne psıhologııa fakýltetiniń aǵa oqytýshysy Tılla Saqtaǵanova jarylystan zardap shekkenderge psıhologııalyq turǵydan keńes berýde.
«Arysta bolǵan oqys oqıǵaǵa baılanysty zardap shekkenderge kómek qolyn sozý maqsatynda elimizde «Arys, biz birgemiz!» aktsııasy bastalǵan bolatyn. Igilikti shara barysynda mınıstrlik qyzmetkerleri men otandyq joǵary oqý oryndarynyń ujymy azamattyq tanytyp, múmkindiginshe kómek kórsetýde. Azamattyq qoǵamnyń belsendiligin, janashyrlyǵyn aıǵaqtaıtyn osynaý qaıyrymy mol isten shet qalmaý maqsatynda Qazaq ulttyq qyzdar pedagogıkalyq ýnıversıtetiniń qyzmetkerleri de bir kúndik jalaqysyn apattan zardap shekken aǵaıynǵa aýdarýdy jón dep tapty. Jınalǵan qarajatqa azamattarǵa qajetti degen turmystyq zattar, kıim-keshekter men azyq-túlik alynyp, ol beketterge ornalasqan turǵyndarǵa tolyqtaı taratyldy,» - deıdi Qyzdar ýnıversıtetiniń Áleýmettik damý jónindegi prorektory Jańagúl Sultanova.
Sapar aıasynda oqý ornynyń basshylyǵy Arys qalasynda turatyn ýnıversıtet stýdentterimen de kezdesip, jaǵdaılarymen jete tanysty. Olardyń búgingi ahýalyn bildi.
Eske sala ketsek, Arystaǵy jarylystan zardap shekkenderge kómek qolyn sozý maqsatynda elimizde «Arys, biz birgemiz» aktsııasy ótip jatyr. Aktsııa aıasynda memlekettik mekemeler men kásiporyndar jáne ózge de azamattar úles qosyp, materıaldyq jáne qarjylaı kómektesýde.
