Almatylyq úsh búldirshin qyz «Pýst govorıat» baǵdarlamasyna qatysý úshin Máskeýge attandy (FOTO/VIDEO)
ALMATY. QazAqparat - Ǵalamtor arqyly dúıim jurtqa tanymal bolǵan almatylyq apaly-sińlili úsh qyz - Ámına, Ádııa jáne Arýjan Malǵajdar Andreı Malahovtyń «Pýst govorıat» baǵdarlamasyna túsý úshin Máskeýge attandy. Bul týraly Ámına Malǵajdardyń Instagram áleýmettik paraqshasynda málim etildi.
Onda apaly-sińlili úsheýdiń anasy Araı Malǵajdar: «Minekı, biz Máskeýge ushyp baramyz. Sizder bizdi Malahovtyń izdep jatqany jaıynda jazyp edińizder. Mine sol úshin Máskeýge «Pýst govorıat» baǵdarlamasynyń «Afftar Jjot» aıdaryna qatysý úshin bara jatyrmyz. Qoldaý kórsetkenderińiz úshin jáne qyzdarymyzǵa degen súıispenshilikterińiz úshin barlyqtaryńyzǵa rahmet!», - dep jazǵan.
Qyzdardyń ákesi Ramazan Malǵajdardyń sózine qaraǵanda, Máskeýge búkil otbasy ushyp kelgen. Baǵdarlamanyń túsirý jumystary erteń bastalady. Al senbi kúni otbasy Almatyǵa ushyp keledi.
Esterińizge sala ketelik, «Pýst govorıat» tele baǵdarlamasynyń 2015 jylǵy 8 jeltoqsandaǵy shyǵarylymynda kórermender Instagram jelisiniń kishkentaı juldyzdary - jańadan bastap kele jatqan vaınerler («vaın» - ómirden alynǵan qysqasha kúlkili beıne kórinis) - almatylyq apaly-sińlili úsh qyzdy kórgen bolatyn.
Olardyń «Sińlińnen planshetti qalaı tartyp alýdyń joly» atty beınerolıgin ǵalamtor paıdalanýshylar Youtube resýrsynan 1 mln. 200 myńnan astam ret kórip úlgergen.
Ámına, Ádııa jáne Arýjan qysqa ýaqyttyń ishinde ǵalamtordyń naǵyz juldyzdaryna aınalyp shyǵa keldi. Óıtkeni, olardyń ata-anasy osy ýaqyt ishinde qyzdaryna qatysty qysqa da kúlkili beınerolıkterdi jelige shyǵaryp otyrǵan. Kúni búginge deıin apaly-sińlilerdiń ózindik fılmotekasynda 100-den astam parodııa men vaındar jınaqtalypty.
«Munyń barlyǵy kádimgi úıde túsirilgen vıdeodan bastaldy. Alǵashynda ózimiz úshin túsirip júrdik. Keıin, dostarymyzǵa tarata bastadyq. Olarǵa qatty unady. Odan keıin, bizge de beınerolıkter jiberilip jatty. Biz adamdarǵa unaıtynyn túsinip, kóbirek túsirýge kiristik», - dedi osyǵan oraı qyzdardyń ákesi.
Aıta ketelik, beınerolıkterdiń stsenarıin kóbinese qyzdardyń anasy Araı Malǵajdar ázirleıdi. Ol sondaı-aq, ári rejısser ári operator.
