Almatylyq urlaǵan «Toyota Camry 70» kóligin shet elge shyǵaryp satpaq bolǵan
ALMATY. QazAqparat – Almaty polıtsııasy «Toyota Camry 70» avtokóligin urlaǵan kúdiktini ustady, dep habarlaıdy QazAqparat tilshisi Almaty qalalyq PD baspasóz qyzmetine silteme jasap.
Qala turǵyndarynyń biri Bostandyq aýdany polıtsııa basqarmasyna 17 jeltoqsanda kóliginiń urlanǵanyn aıtyp, aryz jazǵan. Kólik urlyǵy boıynsha QR QK 200-babymen is qozǵalyp, izdestirý sharalary júrgizildi.
«Sotqa deıingi tergeý barysynda kólikti aıdap áketken kúdikti jábirlenýshiniń tanysy ekeni belgili boldy. Ol kólik ıesiniń senimine kirip, avtokóliktiń kiltin úıinen urlap shyqqan. Ol «Toyota Camry 70» kóligimen óziniń aýylyna barǵysy kelgenin aıtty. Alaıda ol keıin urlanǵan kólikti Qyrǵyzstanǵa aparyp satpaq bolǵanyn da joqqa shyǵarǵan joq», - deıdi Bostandyq aýdany polıtsııa basqarmasynyń basshysy Dáýren Ótebaev.
Kúdikti 19 jeltoqsan kúni keshke Almaty-Taraz tas jolynyń boıynda ustaldy. Ol Merke aýdanyna avtokólikti jalǵan memlekettik nómir taǵyp, jetkizbek bolǵan. Jambyl oblysynyń polıtsııa departamentimen birikken operatsııa barysynda tabylǵan avtokólik ıesine qaıtaryldy. Qazir 24 jastaǵy jigit Almaty qalalyq PD ýaqytsha oqshaýlaý ızolıatoryna qamaldy.
Buǵan deıin, Almatyda sońǵy birneshe aıda Toyota Camry avtokólikteriniń urlanǵandyǵy týraly jazǵan bolatynbyz.
