Almatylyq UOS ardagerlerine elektr qýaty úshin tólemaqy tóleýde jeńildikter kórsetiledi

ALMATY. QazAqparat - Almaty qalasy men Almaty oblysy aýmaǵynda turatyn Uly Otan soǵysynyń ardagerleri «Ardager - máńgi dańq» aktsııasy aıasynda 2015 jyldyń 1 mamyrynan 31 jeltoqsanyna deıin aı saıyn 70 kVt/saǵat elektr qýaty úshin tólem tóleýden bosatylady. Bul týraly búgin «AlmatyEnergoTutyný» JShS baspasóz qyzmetinen habarlady.

«Uly Jeńistiń 70 jyldyǵyna baılanysty búkil el bul merekeni keń kólemde atap ótýge daıyndalýda. Osy uly mereıtoıǵa arnap, «AlmatyEnergoTutyný» JShS «Ardager - máńgi dańq!» aktsııasyn daıyndap jatyr. Aktsııa aıasynda Almaty qalasy men Almaty oblysy aýmaǵynda turatyn Uly Otan soǵysynyń ardagerlerine elektr energııasy boıynsha tólenetin tólemderge qatysty jeńildikter berý qarastyrylǵan», - delingen habarlamada.

Aktsııa aıasynda 2015 jyldyń 1 mamyry men 31 jeltoqsany aralyǵynda «AlmatyEnergoTutyný» JShS qyzmet etý aýmaǵynda turatyn Uly Otan soǵysynyń ardagerleri «AlmatyEnergoTutyný» JShS qarajattarynyń esebinen aıyna 70 kVt/saǵat elektr energııasyn tóleýden bosatylady. Osy kezeńde, ıaǵnı aǵymdaǵy jyldyń sońyna deıin ardagerler tek osy kólemnen artyq tutynǵan elektr energııasy úshin ǵana tólem jasaıtyn bolady.

Kompanııanyń saıtynda zeınetaqy tóleý jónindegi memlekettik ortalyqtyń qalalyq jáne oblystyq fılıaly men Ardagerler keńesteri usynǵan jeńildikti alatyn tutynýshylardyń tizimi ornalastyryldy.