Almatylyq ýnıversıtet Úndistannan stýdentterdi «jasyryn» ákelmek bolǵan

ALMATY. QazAqparat – Koronavırýs órship turǵan Úndistannan Almatyǵa stýdentterdi «jasyryn» ákelmek bolǵandar anyqtaldy. Bul týraly máslıhat sessııasynda qala ákimi Baqytjan Saǵyntaev aıtty, dep habarlaıdy QazAqparat tilshisi.

Ákimniń aıtýynsha, Almatyǵa stýdentterdi JOO-lar ákelgisi kelgen, bul josparly is-shara bolǵan.

«Bizde brıtandyq jáne óńtústikafrıkalyq shtamm bar. Endi, Alla saqtasyn, bizge úndistandyq shtamm kelmesin. Jaqynda bizde Úndistannan josparly túrde stýdentterdi ákelgisi kelgender anyqtaldy. Ol jaqtan bári qashyp jatyr. Al bizdiń keıbir rektorlarymyz ýnıversıtet tabys tabýy úshin Úndistannan stýdentterdi shaqyryp júr. Olar bizge úndi shtamyn ákeledi dep oılap otyrǵan joq. Eshkimge bildirtpeı ákelmek bolǵan, biraq biz ony toqtattyq», - dedi Almaty ákimi Baqytjan Saǵyntaev.

Sonymen qatar, ol depýtattar men mekeme basshylaryn halyq arasynda vaktsınatsııa boıynsha túsindirý jumysyn júrgizýge shaqyrdy.