Almatylyq úkimettik emes uıymdar Elbasynyń ókilettigin uzartý jónindegi bastamaǵa qoldaý bildirdi

ALMATY. 27 qańtar. QazAqparat /Erbol Turymbetov/ - Búgin Almatyda Ó. Joldasbekov atyndaǵy Stýdentter saraıynda «El tilegi - Elbasy» taqyrybynda Almaty qalasyndaǵy qazaqtildi úkimettik emes uıymdar ókilderiniń QR Prezıdenti N. Nazarbaevtyń ókilettigin 2020 jyldyń 6 jeltoqsanyna deıin uzartý bastamasyna qoldaý bildirýge arnalǵan dóńgelek ústeli ótti.

Otyrysqa qatysýshylar talqylaý barysynda QR Prezıdenti N. Nazarbaevtyń elimizdegi azamattyq qoǵamdy damytýda úkimettik emes uıymdarǵa zor qoldaý kórsetip otyrǵanyn atap ótti.

«Úkimettik uıymdarǵa jyl saıyn memleket tarapynan bólinetin qarjyny 1 mıllıard teńgeden asyrýdy kótergen bolatynbyz. Bul másele sheshimin taýyp, qazirgi tańda qoǵamdyq ozyq ıdeıalardy qarjylandyrý men júzege asyrýǵa múmkindik týdy», - dedi «Jeruıyq» qoǵamdyq birlestiginiń tóraǵasy Bolatbek Tólepbergen.

«Jeltoqsan jańǵyryǵy» qozǵalysynyń tóraǵasy Tólegen Áljan da osy pikirdi qoldap, qarqyndy damý jolyndaǵy qazaq eline Elbasynyń ári qaraı basshylyq ete berýi qajettigin atap ótti.

Jıyn sońynda basqosýǵa qatysýshylar Elbasynyń ókilettigin 2020 jyldyń 6 jeltoqsanyna deıin uzartý bastamasyn qoldaıtyndyqtaryn bildirdi.