Almatylyq turǵyn polıtsııaǵa 3 myń ret qońyraý shalǵan
ASTANA. QazAqparat - Іshki ister mınıstri Qalmuhanbet Qasymov «102» nómirine baılanysa almaı, shaǵymdanǵan azamattardyń aryzyna qatysty pikirin bildirdi, dep habarlaıdy QazAqparat tilshisi.
«102» nómirine baılanysa almaýǵa qatysty shynynda da bizge birshama aryz-shaǵymdar túsip jatyr. Biz taldaý jumystaryn júrgizip, máseleni zerttedik. Shynynda da, ol máselege birneshe faktor sebep bolyp otyr. Birinshiden, bul bizdiń uıaly baılanys operatorlarynyń jumysyna baılanysty. Másele mynada: Máselen «Altel» arqyly azamat «102» nómirin tergen kezde birden qazaq jáne orys tilinde avtojaýap berý qosylady. Osydan keıin ǵana baılanysqa shyǵady. Al «Tele2» nemese Ksell sekildi baılanys operatorlary bul qońyraýlardy 112-ge laqtyryp otyrǵan. Osydan keıin ǵana 102-ge qońyraý kelgen. Biz bul máseleni taldadyq, olqylyqtardy uıaly telefon operatorlary moıyndady. Qazirgi tańda olar bul kemshilikterdiń bárin joıdy. Qazir 102 operatoryna 6 sekýnd ishinde qosady», - dediQalmuhanbet Qasymov.
Mınıstrdiń aıtýynsha, jyl basynan beri 8 aıdyń ishinde «102» nómirine 3,2 mln qońyraý kelip túsken.
«Al bizde barlyǵy 220 operator táýlik boıy jumys istep tur. Júkteme kóp bolǵan soń olardyń múmkindikteri jete bermeıdi. Almatyda bar-joǵy 24 operator, Astanada - 26 operator bar. Búgingi tańda olardyń sanyn arttyryp, 12 saǵattyq jumys kúnine aýystyryp jatyrmyz. 3,2 mln qońyraýdyń ishinde 40% ǵana polıtsııa jumysyna qatysty bolady, qalǵandary - TÚKSh-ke baılanysty, mysaly sýmen jabdyqtaý týraly suraıtyndar barshylyq. Almatyda bir azamat operatorǵa 3 myń ret habarlasyp, únemi turǵyn úıine qatysty jáne basqa da suraqtarmen shaǵymdana bergen jaǵdaı kezikti», - dedi Qalmuhanbet Qasymov.
