Almatylyq túlekterdiń 80 paıyzy UBT tapsyrady
«2017-2018 jylǵy oqý jylynyń UBT ereksheligi testi budan buryn tek orys jáne qazaq tilderinde tapsyrýǵa bolatyn bolsa, bıyl balalar aǵylshyn tilinde tapsyrýǵa múmkindik aldy. Respýblıka boıynsha 250 túlek aǵylshyn tilinde UBT tapsyrýǵa nıet bildirdi. Almatyda 6 bala testti aǵylshyn tilinde tapsyrady», - dedi Gúlnar Hodjabergenova Nur Otan» partııasy bólimshesiniń baspasóz ortalyǵynda brıfıng barysynda.
Onyń aıtýynsha, bıyl Almatyda barlyǵy 9100 oqýshy mektep bitiredi. Olardyń 7300-i UBT tapsyrýǵa ynta bildirgen.
Qalǵan túlekter alys-jaqyn shetel JOO-laryn nemese kolledjderde bilimin jalǵastyrýdy tańdaǵan.
Basqarma basshysynyń aıtýynsha, bıylǵy UBT eki formatta ótedi. Oqýshylar mektepte birinshi qorytyndy emtıhan tapsyrsa, ekinshi kezeńde JOO bazasynda UBT tapsyrady.
Mektepterdegi emtıhan 29 maýsymda algebra, qazaqstan tarıhy, qazaq (orys) tili, tańdaý boıynsha 1 pán boıynsha synǵa túsedi.
«2004-2017 jyldar aralyǵynda UBT-ǵa 99,6 myń túlek qatysqan. Olardyń 89,1 paıyzy shekti ball kórsetkishin jınaǵan. Byltyr 5900 túlek UBT tapsyrsa, olardyń 97,3 paıyzy shekti bal jınady. Almaty boıynsha orta bal kórsetkishi 97,5», - dedi Gúlnar Hodjabergenova.
