Almatylyq túlekter lımýzınmen qydyrýdyń ornyna naýqas balalarǵa syılyq aldy
ALMATY. QazAqparat - Almatyda №54 mekteptiń túlekteri dástúrli lımýzınmen qydyrýdan bas tartyp, onyń ornyna Onkologııa jáne radıologııa qazaq ǵylymı-zertteý ınstıtýty balalar ortalyǵyndaǵy palatalardyń birine teledıdar syılady. Bul týraly QazAqparat Qazaqstan pallıatıvtik kómek qaýymdastyǵynyń prezıdenti Gúlnara Kýnırovanyń Feısbýktegi paraqshasyna silteme jasap habarlaıdy.
«Bul kún Almatydaǵy №54 mekteptiń túlekteriniń esinde máńgi saqtalady. Búgin olar kópshilikke oı salar áreket jasady. Barlyq túlekter úshin dástúrli sanalatyn lımýzınmen serýenniń ornyna, olar mektep dırektory men ata-analarymen aqyldasyp, ol aqshany Onkologııa jáne radıologııa qazaq ǵylymı-zertteý ınstıtýty balalar ortalyǵyndaǵy palatalardyń birine teledıdar satyp áperýge jumsaý týraly sheshim qabyldady. Balalardyń kóbine qaıyrymdylyq tájirıbesi ómirlerinde birinshi ret boldy. Bul olardyń jańa jaýapty ómirlerge qadam basar mańyzdy sátindegi ıgi is bolsyn», - dep jazdy Gúlnara Kýnırova.
Qazaqstan pallıatıvtik kómek qaýymdastyǵynyń prezıdenti №54 mekteptiń túlekterine qoldaý bildirgen oqý ornynyń dırektory men ata-analarǵa alǵys aıtty.
«Balalar ortalyǵynda televızory joq 11 palata bar. Osy bastamany 1 maýsym qarsańynda basqa mekteptiń túlekteri jalǵastyrsa nur ústine nur bolar edi», - dep atap ótti Gúlnara Kýnırova.
