Almatylyq túlekter lımýzınge minip, qymbat meıramhanaǵa barmaıdy
ALMATY. QazAqparat - Bilim basqarmasynyń basshysy Gúlnar Hodjabergenova Almatyda bıyl mektep bitirý keshi qalaı ótetini týraly aıtty, dep habarlaıdy QazAqparat tilshisi.
«Almatyda 5-6 jyldan beri bitirý keshteri aýqymdy ótkizilip otyrǵan joq. Mektep aıasynda eshqandaı lımýzın, qymbat meıramhanaǵa barý bolmaıdy. Attestatty tapsyrý saltanaty kúndizgi saǵat 11-12 shamasynda mektep ishinde ótkiziledi. Oǵan eshqandaı juldyzdar shaqyrylmaıdy, tek ata-analar men ustazdar qatysady. Bıyl da 15-maýsymda saltanatty shara osylaı ótedi», - dedi Gúlnar Hodjabergenova.
Onyń aıtýynsha, attestatty qolǵa alǵan soń keıbir ata-analar mektep bitirý keshin aýqymdy ótkizý týraly bastama kótergen.
«2-3 apta buryn osyndaı daýly oqıǵa týraly estidik. Men aıtar edim, eshbir mektep dırektory aqsha jınap, kólemdi shara ótkizbeıdi. Al, ata-analardyń quqyǵyn eshkim shektemeıdi», - dedi G.Hodjabergenova.
Basqarma basshysy 15 maýsymda keshke Altyn belgi ıegerlerine arnap «Jas túlek» festıvali ótkiziletinin aıtty.
«Bıyl qalada 514 túlek Altyn belgi alýǵa úmitker. Áli mektepte attestatsııalyq emtıhan bar. Olardyń sany azaıa túsýi múmkin. Byltyr 417 túlek Altyn belgi nátıjesin rastaǵan bolatyn», - dedi basqarma basshysy.
