Almatylyq tıinniń «taǵdyry» ne bolady
ALMATY. QazAqparat - Funk agenttiginiń jetekshisi Maıra Izmaılova Atakenttegi áıgili alyp tıinniń syrt kelbeti ózgeretinin aıtty, dep habarlaıdy QazAqparat tilshisi.
Onyń aıtýyna qaraǵanda, tıin atalmysh orynǵa qoıylǵaly beri «Atakent» aýmaǵynda aıtarlyqtaı aýqymdy qoǵamdyq-mádenı keńistik qalyptasyp qalǵan. Dese de, osy jyldyń shilde aıynda tıin óziniń «tirshiligin toqtatady». Áıgili art-nysandy jańa joba - Ecobelka kútip tur.
«Bizdiń komanda keremet joba oılap tapty - bul eko-art joba. Osy jazda tıinniń renovatsııasyn iske asyramyz. Tıin qaıtalama shıkizattan jasalady», - deıdi Maıra Izmaılova.
Uıymdastyrýshylar tıindi plastık paneldermen qaptaǵaly otyr. Ol panelder qaıta óńdelgen plastıkterden jasalady.
«Tıinniń arqaýynda metall men aǵashtan jasalǵan tirek bar. Óziniń qyzmet etý ýaqytyn aıaqtap qoıǵan sabandy alyp tastaımyz. Syrtqy qabyrshaqty aýystyryp, eski arqaýǵa jańa materıaldan jasalǵan panel ilinedi. Tıin eski qalpynda qalǵanymen, zamanǵa saı stıl boıynsha ekomaterıaldardan turatyn bolady», - deıdi jobany uıymdastyrýshylar.
Eske sala keteıik, byltyr Almaty oblysynda saban shópten jasalǵan tıin paıda bolǵany týraly jazǵan bolatynbyz.
«Tıinniń quny mıllıard teńge emes. Ǵalamtorda taraǵan aqparat - jalǵan. Tıin - memleket pen Funk agenttiginiń birlesip júzege asyrǵan jobasy. Memleket tarapynan 15 mıllıon teńge qarjy jumsaldy, al jobanyń jalpy quny 23 mıllıon teńgeni qurady», - dedi Funk agenttiginiń basshysy Maıra Izmaılova.
