Almatylyq taksı júrgizýshileri óz qyzmetin zańdastyrýy tıis - Kásipkerler palatasy
Munyń aldynda salyq organdary jolaýshy tasymalymen aınalysatyn taksı júrgizýshileri óz qyzmetin tirkemese, kólikteri tárkilenetini týraly habarlaǵan edi. Atalǵan jaıtqa baılanysty qalalyq kásipkerler palatasy dırektorynyń orynbasary Aıtýar Qoshmambetov túsinikteme berdi.
«Árıne, kóleńkeli ekonomıkamen kúreste túrli tásilder tıimdi. Biraq, aqparatty obektıvti túrde jetkizý mańyzdy. Mysaly, bul másele QR ÁqbK 463-babynda keltirilgen. Onda qyzmetin tirkemeı kásipkerlikpen aınalysqan tulǵalarǵa 15 AEK kóleminde aıyppul salynyp, kásipkerlik quraly tárkilenedi delingen. Bul isti ákimshilik sot qaraıdy. Bul jaǵdaıda kólikti tartyp alý qosymsha óndirý sharasy retinde qoldanylady. Bul áreket sot sheshimimen jasalady. Osy ýaqytqa deıin mundaı tárkileý bolǵan emes. Jáne bolmaıdy dep úmittenem. Sebebi, bul quqybuzýshylyqtan qoǵamǵa eshqandaı nuqsan kelmeıdi», - dedi ol.
Palata ókili jeke adam tasymalymen aınalysatyn taksı júrgizýshilerine HQO arqyly jeke kásipker retinde tirkelýge keńes berdi.
«Buǵan nebári 10 mınýt jetedi. Esesine, resmı jumys jasap, salyq tóleýge, basqa da jeńildikter alýǵa múmkindigińiz bolady», - dedi Aıtýar Qoshmambetov.
Almatyda zańsyz jolaýshy tasymaldaıtyn taksı júrgizýshileri salyq tólemegeni úshin kóliginen aıyrylyp qalýy múmkin ekenin keshe Medeý aýdandyq memlekettik kirister basqarmasy habarlaǵan bolatyn.