Almatylyq sýretshi «Temir Genany» 3 mln teńgege satpaqshy
- Azamat, sizdiń osy málimdemeńizden keıin habarlasyp jatqandar bar ma?
- Iá. Kesheden beri 20 shaqty adam habarlasty. Olardyń basym kópshiligi Astanadan. Elimizge belgili bıznesmender, belgili tulǵalar habarlasyp jatyr. Qazir keshke deıin bir adam kelemin degen Astanadan. Ol kisi «suraǵan somańdy bereıin, biraq kartınany kórme zalyna qoısam» degen oıyn bildirdi.
- Sonda óz jumysyńyzdy qanshaǵa baǵalap jatyrsyz?
- Qazir 3 mln teńge dep otyrmyn. Basynda 1,5-2 mln dep baǵalaǵam. Biraq keıin jol apaty saldarynan aıaǵynan aırylǵan Katıa Parafıeva degen kelinshekke kómektessem degen oımen 3 mln dep qoıdym. Qymbatyraq satsam, kóbirek kómektesem degen oımen. Kesheden beri habarlasqandardyń ishinde 200 000-ǵa surap jatqandar bar. Al shegemen sýret salýǵa tek materıaldyń ózine 200 000 teńge ketedi. Onyń ishinde ózimniń eńbegim bar taǵy da. Sondaı aqylǵa syımaıtyn usynys jasap jatqandar bar.
- Qupııa bolmasa, satyp alatyn kisi kim eken?
- Aıta almaımyn. Ol kisi qarsy bolýy múmkin. Eger mámile bolyp jatsa, ol qarsy bolmasa sýretke túsirip jarııalaımyn. Ol kisiniń qyzyǵýshylyq tanytqanynyń ózi tóbemdi kókke jetkizip jatyr.
- Siz sýretshisiz be? Bul hobbıińiz qaǵazǵa sýret salýdan bastalǵan shyǵar?
- Eń birinshi men Іlııas degen aǵamnyń týǵan kúnine arnap sýret salǵanmyn. Sol jumysym adamdar tarapynan joǵary baǵalanǵan soń ambıtsııam ósip, óz kúshime ózim senip, odan da úlkenirek jobalarǵa kirise bastadym.
- Shegemen sýret salý úshin eń aldymen kúsh kerek pe?
- Shegemen sýret salý kóp kúsh qajet etpeıdi. Tek Býdda hramynyń shaolınderi qusap otyrý kerek, óte kóp tózim kerek. 1 shegeni 5-8 ret qaǵý kerek. Onda 56 myń shege tur. Ózińiz oılaı berińiz, onyń bárin qaǵyp shyǵý úshin qansha tózim kerek. Birneshe balǵa syndy. Qolymdy talaı uryp aldym. Qazir qolym tipten aýyrmaıtyn boldy.
- Shegemen sýret salýdyń qaǵazǵa sýret salýdan ereksheligi bar shyǵar
- Iá. Jumys protsesiniń ózindik ereksheligi bar. Ony bas kezinde men de bilmegen ekem. Eń aldymen onyń ramasyn jasaý kerek eken. Sosyn baryp aǵashyn qaǵyp, artynan shegemen jumys jasaý kerek. Endi ol qatelikterdiń bárin eskeretin bolamyn.
- Bolashaqta taǵy qandaı keıipkerlerdiń shegeden jasalǵan beınesin kóremiz?
- Bolashaqta Alash zııalylarynyń shegeden jasalǵan beınesin kóretin bolasyzdar. Bıyl Alashordanyń qurylǵanyna 100 jyl tolady. Osyǵan oraı kórme ótkizgim keledi. Josparda 25 sýret bar. Biraq, onyń bárin salýǵa qarajat jetpeıdi. Eger, demeýshiler tabylyp jatsa, qoldan kelmeıtin nárse joq. 25 sýretti 3 aıda bitirýge bolady. Qazannyń basynan Qazaqstannyń barlyq óńirlerin aralap shyqsam degen oı bar. Eń sońǵy kórme Astanada nemese Semeıde bolady. Óıtkeni, Semeı qalasy - Alashordanyń astanasy. Ony mýzeıge qabyldasa, quba-qup. Olaı bolmasa, týra «Gena» sııaqty satyp, qolymnan kelgenshe adamdarǵa kómektesemin. Túsinbeıtin bireýlerge syılaǵym kelmeıdi. Odan da kartınany túsinetin, baǵalaıtyn adamdarǵa satyp, bireýlerge kómekteseıin. Internette qazir bireýdiń baqytsyzdyǵynyń arqasynda tanylǵyń keledi degen pikirlerdi de oqyp jatyrmyn. Adamdar ne úshin jaqsylyq jasaǵysy kelmeıdi? Óıtkeni ol qıyn eken. Qoǵamnyń negatıv oılarynan qorqady. Bul sońǵy ret jasaǵan kómegim emes. Kelesi bastap jatqan jumysymda tek shege bolmaıdy. Ony da reti kelse muqtaj adamǵa kómektesý úshin satamyn.
- Suhbatyńyzǵa rahmet.
