Almatylyq sýretshi Kenesary hanǵa arnap erekshe sýret saldy
Almatylyq sýretshi Ásel Sabyrjanqyzy Instagram paraqshasyna Kenesary hannyń sýretin qalaı salǵany týraly vıdeo saldy.
Onda Ásel «Kenesary hannyń barlyq súıegi týǵan jerinde jerlenip, onyń jany tynyshtyq tapsa, qazaq halqy naǵyz berekege keneledi degen senim bar. Han Kenesary Qasymuly – 1837-1847 jyldardaǵy qazaqtardyń Reseı ımperııasynan táýelsizdik alý úshin júrgizgen ult-azattyq antıotarshyldyq qozǵalysynyń jetekshisi»,- degen jazba qaldyrdy.
Áseldiń aıtýynsha, hannyń sýretin erekshe etip salýdy ol bir aı boıy oılaǵan.
«Men Kenesary Qasymulynyń sýretin erekshe etip salamyn dep sheshim qabyldadym. Sebebi, ol qazaq halqynyń sońǵy hany, ult-azattyq kóterilistiń jetekshisi boldy. Ókinishke oraı, Kene han bóten jerde qaza taýyp, súıegi áli kúnge deıin elimizge ákelingen joq. Al ańyz boıynsha onyń súıegi elimizge ákelinse, elimiz odan beter damyp, órkendeı túsedi», - dedi sýretshi.
Ásel sońǵy hannyń sýretin kóz súrmesimen salyp shyqty.
«Kórermenniń nazaryn ónerge aýdarý úshin erekshe materıaldy qoldaný kerek. Sol úshin men kóz súrmesin paıdalandym. Onda kóp kishkentaı adamdy salý arqyly hannyń beınesin qaǵazǵa túsirdim. Basty ıdeıa – Kenesaryny úsh júzdiń basyn biriktirgen tulǵa ekenin kórsetý boldy. Sol sebepti sýrettegi kishkentaı kóp adam sol kezde Kenesarynyń handyǵyn moıyndap, týynyń astyna jınalǵan halyq dese bolady. Jalpy, Kene hannyń osy sýretin eki kúnde salyp shyqtym», - dedi sýretshi.
Sýretshi Ásel Sabyrjanqyzy Almaty qalasynda ómirge kelgen. Bes jasynan bastap sýret salady.
«Almaty qalasynda týǵanmyn. 2002-2018 jyldar arasynda Astana qalasynda turdym. Sonda mektep, kolledj jáne ýnıversıtet bitirdim. Sonda turmysqa shyǵyp, joldasymmen Almatyǵa qaıta oraldym. Qazir Almatyda turamyz», - deıdi Ásel.
Aıta keteıik, Ásel buǵan deıin kóp adamdy salý arqyly Kereı, Jánibek handar, Dinmuhamet Qonaevty beınelegen jáne úsh qaryndashpen bir ýaqytta Tóle bı, Qazybek bı, Áıteke bılerdi, Alash arystary Álıhan Bókeıhanov, Ahmet Baıtursynov, Mirjaqyp Dýlatovtyń sýretterin salǵan.
Eske salaıyq, bıyl qazaqtyń sońǵy hany Kenesary Qasymulynyń týǵanyna 220 jyl toldy.
