Almatylyq sýdıa alaıaqtyq jasady degen kúdikke ilindi

ALMATY. QazAqparat - Almatyda Medeý aýdanynyń sýdıasy múddeli tulǵalardyń kómegimen sot sheshimderin olardyń paıdasyna qaraı shyǵardy degen kúdikke ilindi, dep habarlaıdy QazAqparat tilshisi.

«Almaty qalalyq sotynyń ishki qaýipsizdik bólimi men UQK qalalyq departamenti atalǵan sýdıaǵa qatysty tekseris jumystaryn júrgizdi. Onyń nátıjesinde departament QR QK 190 baby, 4-bólimi, ekinshi tarmaǵy boıynsha qylmystyq is qozǵap, tergeý jumystaryn bastady. Vedomstvonyń habarlaýynsha, bas prokýror kúdikke ilingen sýdıaǵa qatysty tergeý amaldaryn jalǵastyrýǵa óz kelisimin bergen»,- dep habarlady Almaty qalalyq sotynyń baspasóz qyzmeti

Kúdiktiniń úıinde júrgizilgen tintý jumystary kezinde odan úlken kólemdegi aqsha tárkilendi. Qalalyq sottyń baspasóz qyzmeti qalǵan aqparat tergeý jumystaryna baılanysty jarııalanbaıtynyn eskertti.