Almatylyq stýdentterge Tuńǵysh Prezıdent týraly dáris ótti
Jıynda bolashaq pedagogtarǵa medıtsına ǵylymdarynyń doktory, professor, Beıbitshilik pen rýhanı kelisim prezıdenttik syılyǵynyń ıegeri Nına Kaıýpova men memleket jáne qoǵam qaıratkeri, pedagog Zınaıda Fedotova Nursultan Nazarbaevtyń táýelsiz Qazaqstandy qurý jolyndaǵy qajyrly qyzmeti týraly keńinen áńgimeledi. Bas qosýdy Qyzdar ýnıversıtetiniń rektory Gaýhar Aldambergenova ashyp, jınalǵandary merekemen quttyqtady.
«Bul mereke – təýelsizdik shejiresindegi eń mańyzdy datalardyń biri. Bul – qazaq qazaq bolǵaly Tuńǵysh Prezıdentin búkil halyq bolyp, derbes túrde saılaǵan qýanyshty kúni. Táýelsizdigin jarııalap, azattyǵyn alǵan shırek ǵasyrdan astam ýaqyt ishinde elimizdi kúlli jahan jurtshylyǵy tanyp, moıyndady. Áleýmettik-ekonomıkalyq jáne qoǵamdyq-saıası reformalar tabysty júzege asty. Qazirgi kúnde keń-baıtaq elimizde Elbasynyń bastamasymen atqarylyp jatqan ıgilikti ister táýelsiz Qazaqstandy budan da bıik shyńdarǵa kótererine bizdiń senimimiz mol», – dedi Gaýhar Aldambergenova.
Dáris barysynda Nına Kaıýpova Elbasynyń egemendik jyldarynyń túrli kezeńderinde qabyldaǵan sheshimderine taldaý jasap, kóshbasshyǵa tán basty qasıetterdi atady.
«Otyz jylǵa jýyq el aǵasy bolǵan Tuńǵysh Prezıdentimiz osy ýaqyt aralyǵynda ǵasyrǵa bergisiz isterdi eńserdi. Jańa astanany saldy, áleýmettiń áleýetiniń artýyna sep bolatyn memlekettik baǵdarlamalar men reformalardy tabysty júzege asyrdy, sheteldegi qandastarymyzdyń atajurtqa oralýyna yqpal etti, «Bolashaq» baǵdarlamasymen qazaq jastarynyń shetelde oqýyna múmkindik berdi. Eń bastysy – halyqtyń ál-aýqaty artty, Qazaqstan álemniń damyǵan elderiniń sapyna ilesti», – dedi Nına Kaıýpova.
Al Qazaqstannyń eńbek sińirgen zańgeri Zınaıda Fedotova elordany kóshirý kezindegi oqıǵalardy eske aldy.
Jıyn sońynda Qyzdar ýnıversıtetiniń stýdentteri arasynda uıymdastyrylǵan «Elbasy joly» atty esse baıqaýynyń jeńimpazdary marapattaldy. Qazylar alqasynyń sheshimi boıynsha Qazaq fılologııasy jáne álem tilderi fakýltetiniń 2-kýrs stýdenti Aınur Jánibekova men Fızıka-matematıka fakýltetiniń 3-kýrs stýdenti Zýhra Erdalıevanyń shyǵarmasy úzdik dep tanyldy.
Aıta keteıik, Tuńǵysh Prezıdent kúni qarsańynda elimizde «Qazirgi zamanǵy Qazaqstan. Elbasynyń kóshbasshylyq sabaqtary» taqyrybynda jalpyrespýblıkalyq shara bastaý alǵan bolatyn.
