Almatylyq stýdentterdiń týberkýlezge shaldyǵýyn mamandar JOO basshylyǵynan kóredi
ALMATY.QazAqparat - Almaty qalalyq Qoǵamdyq Densaýlyq saqtaý basqarmasynyń basshysy Aızat Moldaǵasımova almatylyq stýdentter arasynda týberkýlezdiń taralýynyń birneshe sebebin atady, dep habarlaıdy QazAqparat tilshisi.
Budan buryn habarlanǵandaı, 2018 jyly Almaty qalasynda 8 stýdent týberkýlez aýrýyna shaldyqqany anyqtalyp, onyń ekeýi derttiń ashyq túrindegi formasymen aýrýhanaǵa jatqyzylǵan. Aızat Moldaǵasımova juqpaly aýrýǵa shaldyqqan stýdentter medıtsınalyq baqylaýǵa alynbaı, asqynǵanda ǵana em surap ózderi kelgenin aıtty.
«2018 jyly 8 jaǵdaı tirkelip, 2 eki stýdent týberkýlezdiń ashyq formasymen aýyrǵany anyqtaldy.2017 jyly 57 stýdent tirkelse, onyń 33 paıyzy asqynǵanda baryp, em surap kelgen. Bul óte qaýipti kórsetkish. Joǵary oqý oryndarynyń medıtsına salasy boıynsha jaýapty, laýazymdy tulǵalaryna aıyppul saldyq. Onyń mólsheri 20 AEK kóleminde. Biraq, bul jetkiliksiz dep esepteımin. Kóp jaǵdaıda aıyppul tólenip, oqıǵa umytylyp ketip jatady. JOO basshylary bir medıtsınalyq ortalyqty tańdap alyp, kelisimshart jasasady. Sol medortalyq stýdentterdi qaraýǵa mindetti. Birinshiden,profılaktıkalyq tekserýdiń sapasy tómen. Ekinshiden, stýdentterdiń densaýlyǵyn únemi qadaǵalap otyrý qajet. Týberkýlezben aýyratyn stýdent anyqtaldy ma, ony tirkeýge alyp, baqylaýda ustaý qajet», - degen Aızat Moldaǵasımova endi sol dertke shaldyqqandar shyqqan JOO-larǵa qyzmet kórsetetin medıtsınalyq ortalyqtarǵa jekeleı qoldanylatyn sharalar qujattary ázirlenip jatqanyn jetkizdi.
Mamannyń aıtýynsha,stýdentter arasynda juqpaly derttiń órshýiniń birneshe sebebi bar.
«Bul jaǵdaıǵa JOO basshylary tikeleı jaýapty. Oqý korpýstarynda joba boıynsha kórsetilgen mólsherden artyq stýdentter oqıdy. Bul adam densaýyǵyna áser etedi. Stýdentterdiń kóptiginen ýaqytynda tazalyq jumystary júrgizilmeıdi. Ǵımarattardaǵy jeldetkishter istemeıdi. Aýyrǵan stýdentterdiń ımmýnıteti álsiregen, durys tamaqtanbaǵan. Eger profılaktıkalyq tekseris durys júrgizilgende mundaı kórsetkish azyraq bolatyn edi. Óıtkeni, 2017 jyly anyqtalǵan 57 stýdent te, 2018 jyly anyqtalǵan 8-i de oqýǵa qabyldanyp, profılaktıkalyq baqylaýdan ótken. Rektorat bul jaǵdaıdy ózderi qolǵa almasa jaǵdaı qıyndaı beredi»,- dedi Aızat Moldaǵasımova.
Eske sala keteıik, Almaty qalasynda 2017 jyly 623 týberkýlezge shaldyqqan adam tirkeldi. Onyń 57-si stýdent jáne 9 paıyzy zeınetker. Stýdentterdiń deni Qyzdar pedagogıkalyq ýnıversıtetinde oqıdy. Sonymen qatar, ál-Farabı atyndaǵy Qazaq Ulttyq ýnıversıteti, Medıtsınalyq ýnıversıtet, Almaty tehnologııalar ýnıversıteti,Abylaı han atyndaǵy Halyqaralyq qatynastar jáne álem tilderi ýnıversıtetiniń stýdentterinen týberkýlez anyqtaldy.
