Almatylyq stýdentter saılaýǵa belsendi túrde qatysýda - №186-shy saılaý ýchaskesi komıssııasynyń tóraǵasy
ALMATY. 3 sáýir. QazAqparat /Erlik Erjanuly/ - Almatydaǵy ál-Farabı atyndaǵy Qazaq ultyq ýnıversıtetiniń stýdentteri QR Prezıdentiniń kezekten tys saılaýynda belsendilik tanytýda.
Joǵary oqý ornynyń rektory Ǵalymqaıyr Mutanovtyń aıtýynsha, QazUÝ stýdentteri №186-shy, №187-shi saılaý ýchakelerinde daýys berýde.
«Búgin Qazaqstan memleketiniń tarıhynda qalatyn aıtýly kúnderdiń biri. Ǵulamalar - «búgingi kúnimiz erteńgi tarıh» degen eken. Bizdiń ýnıversıtet memleketimizdiń bolashaǵyn qalaıtyn jas mamandardy daıarlap, olardyń durys tańdaý jasaýyna kómektesedi. Al búgingi saılaýda durys tańdaý jasaý búkil qazaq eline úlken jaýapkershilikti artady», - deıdi Ǵ.Mutanov. Onyń aıtýynsha, №186-shy saılaý ýchaskesinde 8 fakýltetten barlyǵy 3180 adam daýys berý kerek, saǵat 11-ge deıin onyń 700-den astamy óz tańdaýyn jasady. Al №187-shi saılaý ýchaskesinde 3024 adamnyń úshten biri daýys berip úlgerdi.
«Stýdentter saılaýǵa belsendi túrde qatysýda. Aýa raıynyń jaısyzdyǵyna qaramastan, kóńil-kúıleri jaqsy. Saılaý ýchaskesine birinshi bolyp kelgen saılaýshylardy jáne týǵan kún ıegerlerin quttyqtap, syı-sııapat berdik», - dedi №186-shy saılaý ýchaskesi komıssııasynyń tóraǵasy Esbergen Alaýhanov.
