Almatylyq stýdentter ózi joıylyp ketetin staqan oılap tapty

ALMATY. QazAqparat - Almaty qalasynda «Tiregi sender elimniń» respýblıkalyq festıvaline qatysqan stýdentter ınnovatsııalyq ıdeıasy úshin mıllıon teńge kólemindegi grant utyp aldy, - dep habarlaıdy QazAqparat.

«Tiregi sender elimniń» respýblıkalyq festıvali Almaty qalasynda tórtinshi ret ótti. Bıyl Qazaqstannyń ártúrli aımaqtaryndaǵy (Almaty, Astana, Pavlodar, Aqtóbe men Shyǵys Qazaqstan) ýnıversıtetterden kelgen 8 top festıval aıasyndaǵy «Jas tolqyn» olımpıadasynda fızıkalyq múmkindikterin kórsetti. Aımaqtardan kelgen 40 stýdent 100 metr qashyqtyqqa júgirý, sekirý jáne dop laqtyrý syndy saıystarǵa qatysty. Odan bólek, stýdentter sheshendik ónerlerin pash etip, qyzyqty bıznes-ıdeıalaryn tanystyrdy.

Festıvaldi QR Tuńǵysh Prezıdentiniń qory janyndaǵy jas ǵalymdar keńesi uıymdastyrdy.

«Festıval jas kásipkerler úshin bastaý alańyna aınalyp úlgerdi. Mysaly, Sýleıman Demırel atyndaǵy ýnıversıtetiniń stýdentteri jumyssyz jastardyń sanyn qysqartý maqsatynda «JobBer» mobıldi qosymshasyn ótken jyly usynyp, jeńimpaz atanǵan. Osy syndy jobalardyń júzege asyrylýy - festıvaldiń basty kórsetkishi», - Festıvaldi QR Tuńǵysh Prezıdentiniń qory janyndaǵy jas ǵalymdar keńesiniń tóraǵasynyń orynbasary Sýhrab Japarov.

Mıllıon teńgeniń ıdeıasy kreatıvti ári suranystaǵy kontseptsııaǵa ıe bolýǵa tıis. Stýdentter usynǵan jobalar arasynda qalada gúl satatyn avtomattar ornatý, ózine-ózi qyzmet etetin kıim jýý ortalyqtaryn ashý, ınnovatsııalyq aýany tazalaý qurylǵysyn jasaý syndy ıdeıalar boldy.

Festıval tóreshileriniń sheshimi boıynsha, Qazaq memlekettik qyzdar pedagogıkalyq ýnıversıtetinen kelgen «Ideal» tobynyń «SeedCup» ıdeıasy eń úzdik dep tanyldy. Stýdentter bıologııalyq túrde ózi joıylatyn kofe staqandaryn shyǵarýdy usynǵan. Bul ıdeıany júzege asyrý arqyly stýdentter tabıǵatty saqtaýǵa óz úlesterin qosatyndaryn aıtty.

    

Avtor: Joldas Órisbaev