Almatylyq stýdent qashyqtan oqytýǵa arnalǵan bilim berý portalyn ázirledi
ALMATY. QazAqparat – Qanysh Sátbaev atyndaǵy Qazaq ulttyq tehnıkalyq ýnıversıtetiniń stýdenti Sanjar Qurmanǵalıuly ózi oqyǵan mektepke qashyqtan oqytý rejımine kóshýi úshin arnaıy bilim berý portalyn ázirlep berdi, dep habarlaıdy QazAqparat tilshisi.
Sanjar aýyldaǵy mektepke kómektesý maqsatynda oqýshylarǵa arnalǵan bilim berý portalyn ázirledi. Saıtty daıyndaý úshin ol Moodle platformasyn qoldandy jáne muǵalimderge saıtpen jumys isteýdi túsindiretin beınejazba jasady. Bul jumystarǵa onyń bir apta ýaqyty ketti.
«IT quraldarymen jumys isteýge mektep muǵalimderiniń bári birdeı daıyn emes, sondyqtan olar WhatsApp pen áleýmettik jelilerdi qoldanýdy jalǵastyrýda. Men veb-saıttardy ázirleýmen kópten beri aınalysyp kelemin, veb-saıt qurý maǵan qıyn bolǵan joq. Mamandyq tańdaıtyn ýaqyt kelgende, kóp oılanbastan ózime unaıtyn ispen aınalyssam dep sheshtim de, baǵdarlamalaý mamandyǵyn tańdadym. Aldaǵy ýaqytta men jaqsy baǵdarlamashy, óz isimniń mamany bolǵym keledi»,– deıdi Sanjar Qurmanǵalıuly.
Sanjardyń aıtýynsha, ol ózi de qashyqtan bilim alyp júr. Ýnıversıtette oqýmen qatar, ol osy joǵary oqý ornynda operator bolyp jumys isteıdi. Onlaın kýrstaryna arnalǵan beınejazbalardy daıyndaıdy. Qashyqtan oqý rejımine aýysý esh qıyndyq týdyrmaǵanyn tilge tıek etti.
«Biz tipti aıyrmashylyqty sezbedik te. Únemi toppen, oqytýshylarmen, edvaızermen baılanysta bolamyz. Olar bizdiń oqýymyzdy baqylap, qoldaý kórsetedi. Sabaq keste boıynsha naqty ýaqyt ishinde ótedi, aldymen oqytýshynyń dárisi, sodan keıin pikirtalas túrinde ótkiziledi»,– deıdi stýdent
Sanjar Jambyl oblysy Shý aýdany Jańa jol aýylynda dúnıege kelgen. Ol Baýyrjan Momyshuly atyndaǵy orta mektepte oqydy.
